Ślonzoki w Warszawie

Jak żech boł zeszły miesionc we Warszawie, znod żech tam dwie ślonske pamiontki. I to łobie we tamtejszyj katedrze Świyntego Jona.

Nawa główna Archikatedry św. Jana w Warszawie

Piyrszo, to nagrobek pochowanego w bocznyj kaplicy przedwojynnego Prymasa Augusta Hlonda.

Nagrobek Prymasa Augusta Hlonda

August - dyć same miano godo, że synek ze Ślonska - prziszoł na świat we Brzynczokowicach. Zanim poszoł do Gniezna (znaczy zostoł Prymasym) i do Stolicy, boł piyrszym biskupym blank nowyj diecezyji katowickyj. Tworzoł nosz lokalny Kościoł niy dugo potym, jak konsek Ślonska przeciongli do Polski.

Drugim Ślonzokym upamiyntnionym we warszawskij katedrze, je Wojciech Korfanty.

Popiersie Wojciecha Korfantego

Jego popiersie wisi vis-a-vis kaplicy z Hlondym. Tyn podobnie: nojpiyrw przysłużoł sie do Ślonska, a potym kcioł naprostowywać cołko Polska. Niy wszystkim sie to podobało. Niyjaki Piłsudski i inksze zawarli go w hareszcie, prześladowali, wypyndziyli, jak sie wrocioł, to juzaś zawarli i tak wymynczyli, że puściyli go pora dni przed śmierciom do dom. Misiezdo niy kcieli, coby im we hareszcie wykitowoł.

Ślonzoki we Warszawie nigdy niy mieli leko.

Łostońcie z Bogiym