Muzeum Powstań Śląskich

We Świynto Niepodległyj Polski wybrał żech się na Świony, coby podziwiać nowoôtwarte Muzeum Ślōnskich Powstań.

Trza pamiyntać, że we 1918 nos dopiyro zaczli wielge polityki łoździyrać na dwie strony.

Na końcu tyj piyknyj drogi wyônaczyli muzyjum.

ul. Polaka - by Cie naprało! - to im sie udało :)

Wyglono piyknie. Je sie czym poasić. A i ludziow prziszło dzisioj siła. Normalnie musiołch stŏć w raji.

Kiejś to boł budynek Donnersmarckow

Toż właża rajn

Tera te muzea robiōm inakszyj niż piyrwyj. Niy trza już ôblykać tych szpetnych laciōw, a we środku idzie pomacać roztōmajte wihajstry, załōnczać szaltry, klikać na fotki i gaftać na filmy, kaj ci wszyjsko tuplikujōm.

Sala zdrzadłowo

Waszbret i inksze pieroństwa dlo pranio

Powstania niy pamiyntom, ale take ławki mioł żech jeszcze w podstawowce

Możno niy wicie ale trzi ślōnske powstania boły we 1919, 1920 i 1921. Ô czym bydzie dano czyńść, stoło już na progu.

Wlazuja we I powstanie

Niystety powstania to zawsze je szczylanie ludziow do ludziow. W naszym przipadku czasym szczyloł sonsiod do sonsiada, kere jeszcze pora tydni tymu ze sobōm normalnie gŏdali, a nawet bracik do bracika.

Karabiny i inksze flinty, a nawet tank 

W tych ciynżkich czasach poza wojnom, kcieli - i susznie - wyłonaczyć coś bardzij cywilizowanie bez plebiscyt. Jak miało być welowanie, to tyż ôbie strony puściły w ruch swoja propaganda.

Fto za Polskom, a fto za Niymcami?

Jak sie niy dało po dobroci, bo Poloki plebiscyt przegrali ...

60% za Niymcami 40% za Polskom

... to zaś kozali chopōm lŏtać z karabinami i sie szczylać.

Czy taki ôbrazek szło widzieć z ôkna familoka w 1921?

Koniec kōńcōw we 1922 Ślōnsk rozdarli na dwie poły i jak napisali na jednyj tabuli: "...na podzielony Górny Śląsk wkroczyły entuzjastycznie witane wojska - od wschodu polskie, a od zachodu niemieckie".

Niy wiym wiela chopa we powstaniach zginyło. Przeczytołech za to, że prawie świerć miliona ludziow musiało sie przekludzić: fto kcioł do Polski, a fto kcioł do Niymiec.

Ônaczynie granic, tuplikowanie, że ôni som pierońskim wrogym, kŏzanie szczylać ze flintow to je zawsze festelno tragedyjo. Żeby tak my z historyje naszych starzikōw byli bardzij mōndrzyjsi!

Ôstońcie z Bogiym