Cołke szczyńscie, że jo niy ma muzykont. Dziynki tymu, jak sie zicna na koncercie, to po prostu se suchom.
Jo niy poradza wyczuć, czy grajom za gibko, czy za wolno, czy przypadkiym ftoś niy zafałszowoł. No chyba, że bołby jakiś łoszkliwy Oł-dur - ftedy to nawet mie po krziżu ciarki przelecom.
Za to jo je inżinier i wczoraj wieczor, jak grała ta frela z Japonie na fortyklapie, to przijszło mi do gowy, jak łoni tym wielgaśny mebel na ta sala wkludzajom.
Ze zadku som sroge słody, na kerych siedzi łorkestra. Z przodku dopiyro, bo scyna je przeca wyżyj.
Jak boła przerwa, żech wyloz ze sale, ale, że jes żech doś wrazidlaty, za kwila bliknołch tam nazod ze bocznego balkona. Łoboczcie, co te nojduchy wyłonaczyli.
By cie naprało!, jak godoł moj świyntyj pamiyńci dziadek.
Łostońcie z Bogiym!
Brak komentarzy:
Prześlij komentarz