Karminadle

Wiycie, z tych kuchynnych łonaczyń to jo nojbardzij poradza ... jejś. Jakosik niy mom grajfki do warzynio.

Som jednak take kwile w życiu, że człeka przipili i musi sie jakoś dać rada. Akurat tak terozki mom. W lodowce boło mielone miynso, to trza boło je zużyć, coby niy zzielyniało. Myśla sie, że narychtuja z tego karminadle. 

Jakby sie tu do tego wziońć?  No wloz żech na google i napisołch: "Jak zrobić karminadle?" Cosik mi tam wyskoczyło KLIK i zaczołch warzyć.

Mielone miynso wciep żech do miski. Na patelnio wloł trocha łoleju. Pokroł żech cebula (bez ślimtanio) i potym żech jom trocha przysmażoł. W gorczku we wodzie żech rozmoczoł wczorajszo żymła. Jeszcze żech potrzebowoł jajco - boło w lodowce i tarto żymła - szukom we byfyju za cukrym - jes. Choć tak żech niy boł blank pewny czy to je to. Gibko posłołch sms do mojij i dobrzech zrobioł, bo sie łokozało, że to boła jakoś mąka czy cuś, a tarto żymła momy w innym szranczku kole nutelle.

No to cuzamyn do kupy wszysko żech wciep do tyj miski z miynsym: uparszczono trocha cebulka, wyciśniynto z wody żymła, jajco, sol, pieprz i zaczon żech to ryncami wygniotać. Bawiołch sie, jak za bajtla w ciaplycie.

W końcu zrobiłch z tego kulki kerech lekko uklackoł i w łoddzielnym talyrzu żech to łobkuloł w tyj tartyj żymle. Na patelnia zaś żech wlol łolyj i żech to zaś parszczoł. Nojgorzij, żech niy wiedzioł kiej to s tyj patelni ściongnoć. Czy to już je dobre, czy jeszcze na poł surowe? Pora razy żech to połobracoł i chyba bydzie ok. I tak 3 razy, bo naroz sie niy kciało zmieścić.

Niy idzie pedzieć nawet mi te karminadle wyjszły. Boły dobre, a dobre. Jak ftoś kce spróbować, to zapraszom, bo mi jeszcze łostały.

Łostońcie z Bogiym!