Dyć co mie wczoraj w dekel pizło, coby sie wybrać do filharminije?
Moja ślubno zaś sie boła, że przyniesa ij ino gańba przi szykownych ludziach i ani niy kciala słyszeć, że pojedzie sy mnom. Rzekla mi yno, cobych się umoł niy ino kark (jak do tyjatru) ale tyż uchole, bo w takij filharmonije to niy wiadomo czy mi sie czyste niy przidadzom.
Wyloz żech zza winkla, pacza stoji i na dodatek nowy sztok dobudowali.
Toż żech sie zaroz zgorszoł. Familok kole nij wyburzyli, mogli i to pieroństwo zwalić, bołby piykny plac na nowy Kaufland, Lidl abo Biedronka, a tak co, taki piykny bauplac w środku miasta sie zmarnowoł.
No ale nic, wloz żech rain, i zaroz kcieli łody mie piniondze. Godom, że jak łorkestra na poł etatu, bo dzisioj ino krzipki mieli dyżur, to i bilet bydzie tańszy. Ale kaj tam. Wzion gość całe czi dychy i sie jeszcze pyto, czy chca tyż program. Co prowda my program zawsze w piontek kupujymy razy z dziynnikym, ale take państwo przedy mnom w raji brali to jo tyż wzion. Dyć tyn karlus za to porachowoł mi jeszcze sztyry złote.
Myślołch, że terozki to już bydzie fest elegancko, ale Wom powiym, że zarozki za drzwiyrzami żech sie zlonk, bo jednymu samo łep (chyba po ściyńciu) na parada wystawiyli.
Misiezdo, że go chycili z czornymi uszami. Łokoropiyństwo.
Łoddołch kurtka w szatnie i w samym ancugu i bindrze wloz żech na sala.
No i zaś żech sie zgorszoł. Po tym remoncie, co go tam mieli, na samym przodku postawiyli wielgachne łorgany - piszczołka kole piszczołki łod wielkich do małutkich. Czy im sie w gowach poprzewrocało? Za piniondze porzondnych łobywateli kościoł kcieli zrobić? Tyn klerykalizm już wszyndzie włazi. A jak już, to niy wiedzom, że w kościele łorgany stowio sie z tyłu?
Dobra, szukom mojego placu. Mioł żech stołek łatwy do zapamiyntanio, bo szosty w szostym rzyndzie. Przedy mnom siedziała tako elegancko frela i sztudyrowała ksionżka. Zaroz żech sie pomyśloł, że to musi być fest intelgynto i kulturalno babka. Czytała tak dugo, aż niy zgasili tego pierońsko wielkego kromlojtera co wisioł nad nami. Zrobioło sie ćma, to łona ksionżka zawarła i ani niy wiym skond, ale wyciongła 1,5 litra peta z mineralwasser i zaczła bardzo elegencko i poleku sie z gwinta pić.
We tyj kwili wyjszli muzykanty. Wszyjske mieli krzyipki, a na końcu wyloz taki gryfny karlus z dugimi wosami i z biydom zakludzioł do swojego krzesła bas. Jak już zaczli potym grać, to tyn mi sie nojbardzij podoboł - ale piłowoł, godom Wom, aż wióry leciały! Rzympolyli możno z godzina. Potym zrobiyli nom kwila przerwy coby my sie dychli. Widać sie znajom na tym, że człek za dugo takego dudłanio niy wytrzymo. Po przerwie, cołke szyńście już boło trocha krocyj.
Po tyj przerwie tyż sie do mie przisiedli take fest, ale to fest elegancke ludzie. Zanim sie zaczło, to łoni zaczli sie ze sobom wadzić. Wadziyli sie jeszcze przez piyrsze piyńć taktow, jak łorkestra już grała, ale godom Wom, jak łoni sie elegancko wadziyli.
Za mnom zaś siedzieli inne gryfne ludzie. Paniczka, żol mi jij boło, bo bez cołki koncert ino sznupała, smarkała, ale wiela niy kucała, to dała rada wysiedzieć do samego końca.
A na koniec, czy sie komu podobało czy niy wszyjscy musieli my klaskać, a ci na scynie porzond sie kłaniali i udowali, że im sie to podobo. Jo sie nawet wystraszoł, że bydzie jakiś bis, ale cołke szczyńscie, niy boło.
Jak mi łoddali mantel, to chcioł żech sie jeszcze wpisać do ksionżki zażalyń, ale żech ij niy znod, a żech sie uwijoł. Wyołobroźcie sie, że niy dość, że łorkestra boła na poł etatu, to niy boło, żodnego zapowiadocza i jo sie musioł som domyślać kery prziszły dzwonek do komórki skomponowol Mozart, a kery tyn Rus Czajkowski. A to jeszcze nic. Bez cołki koncert niy wyloz kapelmajster. Pewnie leżol zalony na zapleczu. Choć jo już downij przipuszczoł, że tyn co stoi przed muzykami i fechtuje tom, jak sie to nazywo, batutom, to je darmozjad i bez niego tyż by sie poradziyli. No i wczoraj sie łokozało, że mioł żech recht.
Coby trocha łodreagować, po filharmonije poszoł żech sie do galerie.
Dobrze, że tam niy kozali łobuwać laćkow, kupować biletu, a na ścianach niy powiesiyli łobrazow, bo bych już tyla kultury na roz niy szczimoł.
Łostońcie z Bogiym
Brak komentarzy:
Prześlij komentarz