Ewangelijo po ślonsku #54

Podle Mateusza:

Jezus łopedzieli swojim uczniom tako bojka:

Krolestwo niybieske podane je na bauera, kery wyloz wczas rano, coby znojś chopow do srywanio wina we swojij winnicy. Ugodoł sie s chopami na dynara za szychta i posłoł ich do roboty. 

U mie w łogrodku

Jak wyloz kole dziewiontyj, trefioł na rynku inkszych, co nic niy robiyli i im padoł: "Idźcie chopy tyż do mojij winnicy, a jo wom za robota zapłaca po mojimu uważaniu". Łoni poszli. Potym jeszcze wyloz kole połednia i jeszcze jak pizło trzi i to samo sie wyłonaczyło.

Kiej wyszoł kole piontyj po połedniu, jeszcze roz trefioł na chopow kerych zapytoł: "Czamu sam stoicie po prożnicy cołki dziyń?" Łodpedzieli mu: "Bo nos żodyn niy najoł do roboty". To im padoł: "Dyć idźcie i wy do mojij winnicy".

Na wieczor bauer pedzioł do swojigo finansministra: "Zawołej chopow i zapłoć im geltag, poczynajonc łod łostatnich, aże do piyrszych". Prziszli ci, co zaczli kole piontyj i erbli po dynarze. No toż ci, kerzy robiyli łod rana, myśleli, że dostanom wiyncyj; ale łoni tyż dostali po dynarze.

Wziynli geltag, ale zaczli wajać na bauera, bo godali: "Ci łostatni robiyli ino godzina, a tyś ich potraktowoł tak, jak nos, kerzy my harowali cołki dziyń we festelynyj hicy". Toż bauer jednym s nich łodpedzioł: "Przyjocielu, niy robia ci krziwdy. Dyć ugodali my sie na dynara, pra? Weź twoje piniondze i idźżyż mi stond. Kca tyż i tymu łostatniymu dać tak samo, jak ciebie. Dyć mom prawo uczynić ze swym, co mi sie podobo, ja? Czy na to złym łokym filujesz, że jo je dobry?" Tak to łostatni bydom piyrsi, a piyrsi bydom łostatni.

S Panym Bogiym