Tak mi sie łostatnio spomniało, że za bajtla, jak żech za fest myndrkowoł, to czasym łojciec mi pedzieli tak:
- Synek, niy być taki mondry, bo pódziesz z Polski raus.
Ja, jo wiym, że to pewnie niy było blank pedagogiczne, ale faktycznie tak sie czasym usłyszało.
 |
| Jo sztudyrowoł z "Elementarza" |
Na łopak do tego powiedzynio łojce wcale mie na groba za hajera niy ciśli. Możno tyż skuli tego, że jo boł zawsze taki chudy borok i hercowy to bych ani prożnyj niy dźwignoł. Porzond mi za to kozali czytać mondre ksionżki, łazić do szkoł i sztudyrować. I Bóg im zapłać za to, bo dzisioj żech je już dwodziesty rok inżynierym łod ekologie, łod wody i gulikow i sie to kwola.
Tak mi sie to spomniało i niy poradza sie spomiarkować, czamu jak ftoś mondry to musi iś z Polski raus. Skond te powiedzynie sie wzionło? Fest mie to tera zafrapowało i łazi mi łod poru dni po gowie. Tak mi sie zdo, że porzekadło mogło być jeszcze z czasow, jak po powstaniach nom granice co kwila przeciskali w lewo i prawo. Abo z czasow wojny - niy wiym.
Możno ftoś z czytelnikow poradzi mi pomoc i wiy, skuli czego mondry mo iś z Polski raus. Byda wdziynczny za kożdo podpowiydź.
Łostońcie z Bogiym
Brak komentarzy:
Prześlij komentarz