Po kolyndzie

Ja, jo wiym. My sam na naszo fara mało kedy zaglondomy, ale kolynda przyjmujymy.

Łońskiego roku to nawet kapelonek sie trocha gorszyli, bo dopiero jak już mieli wyłazić, to my sie przyznali, że moj bracik tyż je ksiyndzym, bo tak z kościoła to nos niy znoł.

Latoś, piyrszy roz, jak dziesiyńć lot miyszkomy w chałpie, przyjszli do nos som farorz. 

Nojpiyrw wleźli ministranty i zaśpiywali kolynda. Tak po prowdzie (wyboczcie sonsiadko) nawet niy wiym, jak im to śpiywanie poszło, bo sie zrobioła w tyn momynt festelno łostuda. Jak karlus, kery pisoł kryjdom na dźwiyrzach mioł swoje naszkryflać, to my sie dopiyro zmiarkowali, że momy jeszcze napis z łońskego roku. Ale gańba - bez cołki rok my sie dźwiyrzow niy wypucowali. :) Uradziyli my pryndko, że niych napisze z drugij strony, choć łon chcioł ino numer zmazać i poprawiyć czi na sztyry. Tera momy łobszkryflane z łobu stron. Niy wierzycie?

Za kwila przyjszli farorz. Porzykali my, farorz pokoj pokropiyli, a potym ściongli mantel i sie siedli. Som żech boł ciekow, czy nos kojarzy. Nojprzod mu sie kartki zamiynioły w kapowniku, ale jak my sie przyznali, jak sie nazywomy to już wszysjcy byli w doma (no co? tak sie godo).

Łoboczoł sie hefty z religie łod chopcow. (Nawet żech niy wiedzioł, że take majom). Popytoł ich kaj chodzom do szkoł. Do Łukasza zażartowoł, że mu Kazik (znaczy moj bracik - kapelonek) pedzioł, że ponoć sie wybiyro do syminarium. Toch synowi prziszoł z łodsieczom, i żech wyzdradzioł, że sie synek po same uszy zakochoł, toć to niy może być prowda. Farorz nadziei niy postradoł, jak Jacek sie przyznoł, że do gimnazium pódzie do Salezjanow na Zgoda.

Wspomnioł żech farorzowi, żech je na drugij Halymbie szafarzym. To mie spytoł, czy faktycznie łostatnio nos uczyli, że do komunije momy przystympować na stojonco. Ja, to je recht - łostatnio take instrukcyje w kurii wydali, ale na nowyj my zawsze byli komunikowani na stojonco, to nom sie nic niy zmiynioło. I tu sie farorz zdziwiyli, że dwie fary kole siebie, a boło inakszyj.

Serdecznie my sie pożegnali, farorz pedzieli, że zaś przijdom za 10 lot i poszli dalij do sonsiadow. Do wieczora jeszcze majom co łazić.

Łostońcie z Bogiym!