Jakżech już dzisiej pozałatwioł wszyjske moje niydzielne łobowiązki i przyjymności: Msza, rodzinny łobiod, drzemka, popołedniowe komunikowanie, łodebranie Jacka, kery przyjechoł z łobozu, kawa w rozszerzonym składzie w łogrodku, to wybroł żech sie na rajza na kole.
Łostanio doś dużo, jak na mie, pyndaluja i dzisioj łobroł żech kierunek na Łorna, coby łodwiedzić mojego bracika. Latoś łon mie zaskoczoł i przyjechoł tyż do mie na kole. Co prowda niy boło nas wtedy w doma, ale i tak my sie trefiyli u kamratow na działce.
Chciołech mu sie zrewanżować, a to już łostatnio sposobnoś, bo sie synek w tyn tydzień przekludzo. Łod wrześnio bydzie kapelonkowoł na Cidrach. Tyż żech mu chcioł zrobic niyspodzianka i dopiyro jakżech sie przykuloł do Łorny, zadzwoniołch, czy je w ogle w doma.
Boł, ino mioł gości. Toch sie ino zameldowoł, chwila żech sie siod, napioł i niy chciołch mu zawodzać, toch sie zebroł.
W farskim łogrodzie znod żech piykne lilije.
Zresztom samo fara tyż maszkytnie kiejś wybudowali.
Zanim ruszoł żech nazod, poszołch jeszcze na lody.
Choć majom na miano tak samo jak jo, bulić żech musioł, jak inni. Niy, to niy je żodno familijo. A zaro za cukernikym postawili misiezdo nojmodszo groba w Polsce - Budryk.
W łokolicy znod żech jeszcze piykny stow.
I wszystkego żech sie mog spodziywać, ale, że spotkom dzisioj ... elefanta, to mi do gowy niy przyjszło. Niy wierzycie? Toż paczcie. Nojprowdziwszy elefant w Łornie:
Łostońcie z Bogiym!
Brak komentarzy:
Prześlij komentarz