Czytanie ze Ksiyngi Powtórzonego Prawa
Mojżysz pedzieli do ludu:
<<Kapłon weźnie ôd ciebie koszyk i położy go przed ôłtŏrzym Pōna, Boga twego. A ty wtynczŏs powiysz take słowa wobec Pōna, Bōga swego:
"Ôjciec mōj, tułacz Aramejczyk, prziszoł do Jegiptu, przibōł tam we niywielgij liczbie ludziow i tam sie rozplynioł w wielgo nacyjo, silno i mnogo. Jegipcjany paskudnie sie s nami ônaczyli, gnymbiyli nos i kŏzali nom pod batym ciynżko robić. Wtynczŏs wajali my do Pōna, Bōga ôjcōw naszych. Pōn usłyszoł nasze wajanie, wejrzoł na naszŏ nyndza, naszŏ ciynżkoś i nasza biyda. Wykludziōł nōz Pōn z Jegiptu silnōm rynkōm i wyciōngniyntym ramiyniym przi wielgij grozie, znakach i cudach. Przikludziōł nōz na tyn plac i doł nom tyn kraj, kaj płynie mlyko i miōd.
 |
| Miōd z Izraela |
Terŏzki żech prziniōs piyrwociny tego, co sie urodziyło ze tyj ziymi, keroś mi doł, Pōnie".
Rozłożysz je przed Pōnym, Bōgym swojim. Ôddŏsz pokłon Pōnu, Bōgu swymu.>>
Czytanie ze Listu Świyntego Pawła Japostoła do Rzymianow
Braty:
Co gŏdŏ Pismo? <<Słowo te je blisko ciebie, na twoij gymbie i we twojim hercu>>. A je to słowo wiary, kero głoszymy. Toż jeśli twojimi ustami wyznŏsz, że Jezus je Pōnym, i we hercu swojim uwierzysz, że Bōg Go wskrzesiōł z martwych - dojdziesz do zbŏwiyniŏ. Dyć hercym przijynto wiara kludzi do sprowiedliwości, a wyznŏwanie jij ustami - do zbŏwiyniŏ. Toż Pismo gŏdŏ: <<Żŏdnego, kery w Niego wierzy, niy bydzie go gańba>>.
Je już wszyjsko jedno, czy ftoś je Żyd czy Grek. Dyć jedyn je Pōn wszyjskich. Ôn to rozdŏwŏ swoji bogactwa wszyjskim, kerzy Go wzywajōm. A dyć <<kożdy, fto wezwie miano Pańske, bydzie zbŏwiony>>.
Ôstōńcie z Bogiym
Brak komentarzy:
Prześlij komentarz