Ślōnzŏk we Grecyji

Jŏ Wōm powiym. Prawie my wrōciyli ze wywczasōw. Ze Grecyje. A konkretnie ze wyspy Zakinthos.

Jŏ sie tam czuł, blank jak u sia.

Choby u nos na Zdeblu

Jak my płynyli szifym na Kefalonia, to jak żech sie ôbrociōł i bliknōł na Zakinthos, to żech klipsnōł tako fotka:

Gōry, jak hołdy wōnglŏ

Powiydzcie sami, czy to niy je podane na hołdy wōnglŏ, kere bez cołkie lata leżały pod kopalniom Halymba. Tera wszyjsko wyprzonatane ino na zoli ôstoł tyn sławny "ślad wynglowy".

Po drodze mijali my resztki z chałupe kere sie wszyjske rozleciały przi festelnym trzynsiyniu ziymi, co sam sie dzioło we 1953 roku.

Ruiny wioski

Dyć skuli szkōd górniczych tak samo wyglōndŏ Wiyrek abo Bytom. Smutne to, ale jŏ sie zaś czuł, jak u sia.

Na tyj wycieczce na Kefalonia trefiyli my do takij jaskinie, kaj najprzōd zleźli my pod ziymia, a potym płynyli tam łōdkami.

Jaskinia Melissani

Troszka im sie sam strop zarwoł, ale i tak to boło blank podane na nasze sztolnie Czŏrnego Pstronga we Tarnowskich Gorach abo Krolowa Luiza we Zobrzu.

U nos, tam kaj my miyszkali, jak sie szło bez wieś, to szło sam trefić na polske fany.

Polsko fana na sztandzie

Dyć to zaś je tak, jak na Ślonsku. Czy je jake świynto czy niy, polske fany tyż nom tu porzond furgajōm.

Ale dejcie sie pozōr, co to je za szpas. Tyn hotel, kaj my z Mojōm miyszkali, mioł miano Pantheon:

Hotel Pantheon

Ôni chyba wiedzieli, że nasz Arcy Panteon ôstatnio ôtwar pod Katedrom we Katowicach i kcieli sie nom przichlybić. Trocha sie szajsli, ale skōnd mieli wiedzieć.

Tak czy inaczyj, jŏ cołki czos czuł sie we tyj Grecyji, jak u nos w dōma, na Ślōnsku.

Ôstōńcie z Bogiym