Biblia po ślōnsku 2

Czytanie ze Ksiyngi Powtōrzōnego Prawa

Tak gŏdŏ Pon:

"Bydziesz dŏwoł pozōr na szabat, co by go świyncić, jak ci nakŏzoł Pon, Bŏg twōj. Szejś dni bydziesz tyroł i robiōł twoja robota, a dziyń siódmy je szabatym Pona, Boga twojego.

Niy bydziesz sie chytoł żŏdnyj roboty ani ty, ani twōj syn, ani twōj cera, ani twōj suga, ani twoja sużōnco, ani twōj wōł, ani twōj ôsioł, ani inkszo gowiydź, ani przibysz, kery je u cia we twojich bramach; coby sie ôdpoczli twōj niywolnik i twoja niywolnica tak, jak i ty. 

Pamiyntej, żeś boł niywolnikym w ziymi jegipskij i wykudzioł cie ôd nich Pon, Bŏg twōj, rynkom ciynżkōm i festelnym ramiyniym: bez toż nakŏzoł ci Pon, Bŏg twōj, dŏwać pozōr na szabat".

Czytanie ze Drugigo Listu Świyntego Pawła Japostoła do Koryntian

Bracia:

Bŏg, kery rozkŏzoł ćmokowi, coby zajaśnioł świotłym, blynduje w naszych hercach, coby ôświycić nos jasnościom poznonio kwały Bożyj na ôbliczu Jezusa Krystusa. 

Katedra w Szczecinie

Trzymomy zaś tyn skarb we glinianych naczyniach, coby ze Boga boła ta przeôgromniasto moc, a niy z nos. Porzōnd znoszymy ciyrpiynia, dyć niy poddŏwōmy sie zwontpiyniu; żyjymy we biydzie, dyć niy wajōmy; znoszymy prześladowania, dyć niy czujymy sie sami; ôbalajōm nos na ziym, dyć niy ginymy. Porzōnd noszymy w ciele naszym konanie Jezusa, coby życie jezusa ôbjawioło sie w naszym ciele.

Dyć porzōnd my, kere żyjymy, som my wydawani na śmierć skuli Jezusa, coby życie Jezusa ôbjawioło sie w naszym śmiertelnym ciele.

Ôstōńcie z Bogiym