W Tyjatrze

Dyć byli my we sobota na wieczor z mojom Ślubnom we Tyjatrze.

Tyjater Ślonski im. Wyspiańskiego (fotka z łońskego roku)

Taki gyszynk my dostali na gyburstag łod kuzynow, za kery piyknie dziyńkujymy.

Jak jo boł już potym łobsztalować na zicher bilety, paniusia we kasie mi pedziała, że tyjater niy bydzie sam, ino we malarnie. Trochach sie zdziwioł, ale sie godom, że tyjater możno w malowaniu, to scyna na tym czos przeniysli do malarnie, a farby i pyndzle do tyjatru.

Jo wiym łod bajtla, że jak sie idzie do tyjatru, to trza umyć kark (jakby ftoś niy znoł tego starego wica, to niych do znać w komyntorzach, to połosprawiom). Kark już żech mioł czysty, ale sie tak myśla, co sie łoblyc? Normalnie do tyjatru bych sie wzion szaket, westa i galoty, ale do malarnie sie człek boji, że sie kaś farbom pomarasi i lepszy by boł arbajtancug. Jak żech jednak łoboczoł Moja, jaki miała piykny klajd ze takim plyjdym (chyba coby sie wytrzić ze tyj farby, jakby sie pomazała), to jo tyż arbaciol zostawioł w doma i łoblyk żech sie szaket, ale żech niy broł bindra.  

No i wczoraj na wieczor przijechali my do Katowic i nawet my znodli parkplac zaroz kole tyj malarnie. Wleźli my do takego ańfartu i blank przed Rawom trza bolo wyńś po słodach do chałpy. Łokozało sie, że tam tyjater, jak sie patrzy. Nawet szatnia łodstawiyli. Łostawiyli my mantle i siedli my sie w takij dziwnyj kafyjce. Stoliki boły, cosik choby bar tyż, ino nic tam niy szło łobsztalować - trocha szkoda, bo bych sie kawy napioł.

Potym zadzwoniyli jak we szkole na lekcjo. Moja, jako że je rechtorkom, łod razu zerwała sie na rowne nogi, jakby leciała na lekcje. Ale niy, zakludziyli nos na piyrszy sztok, a tam boła normalno scyna: ze światłami, głośnikami, i rzyndami zicow dlo nos. Ino prawie tyj kurtyny, co jom na koniec powinni spuścić niy boło.

Kwila my poczekali, zgosiyli lampy i ...

Jak ftoś ciekawy niych sie tyż wybiere. Niy bojcie sie - we tyj malarnie sie niy pomarasicie. Za to uśmiejecie sie fest.

Łostońcie z Bogiym