Podle Mateusza:
Jezus pedzieli dlo swojich uczniow:
Żodyn niy poradzi służyć dwom panom naroz. Bo abo jednego bydzie niynawidzioł, a drugymu pszajoł; abo z jednym bydzie trzimoł, a drugego spieroni. Niy mogecie służyć Pon Bóczkowi i Mamonie!
Beztoż wom godom: Niy starejcie sie ło swoj żywot, ło to co bydziecie jeś i pić, ani ło swoje gnaty, w co je łobleczecie. Dyć żywot to je cosik wiyncyj niż jodło, a ciało wiyncyj niż łoblecze. Filujcie na ptoki: niy siejom ani niy żnom i niy forantujom, a Łojciec wosz niybieski je futruje. Czy wyście niy som zocniejsi niż łone?
Kery z wos, bez toż że sie staro, moge choby ło jedyn dziyń późnij kopnoć w kalyndorz?
A ło łoblecze czymy sie starocie? Filujcie na leluje na polu, jak rosnom: do roboty niy chodzom ani niy heklujom. A godom wom: som Salomon we całkij swyj znoczności niy boł tak łobleczony, jak jedna s nich. No, to jak chabaź z pola, kery dziś rośnie, a jutro go wciepnom na fojera, Pon Bóczek tak łodziywo, toż czy niy liepij zadbo ło wos, ludzie małyj wiary?
No toż sie niy starejcie i niy godejcie: co bydymy jedli, co bydymy pili i co sie łoblekymy. Bo za tym wszyjskim lotajom pogany. Dyć wosz Łojciec niybieski dobrzy wiy, że tego wszsyjskego wom trza. Starejcie sie nojprzod ło Boże krolewstwo i ło jego sprowiedliwość, a to wszysjsko erbniecie cuzamyn.
Dyć sie niy starejcie ło jutro, bo jutrzejszy dziyń som sie ło siebie bydzie staroł. Kożdy dziń mo doś swojij biydy.
S Panym Bogiym
Brak komentarzy:
Prześlij komentarz