Moja ślubno mi pedziała, że za fest sam łostatnio narzekom.
Toż dzisioj byda ino kwolić. A jes co!
Po piyrsze momy latoś piykno zima. Jak śniyg slecioł we wilijo, to ... zaro stopnioł. Ale juzaś po świyntach nasypało i przinajmnij u mie na łogrodku trzymo sie do dzisiej. Downo tak niy boło, żebych miol na placu bioło dużyj niż cołki miesionc, a dalij je mroz i pod szczewikami skrzipi. A przi łokazji czasym sie jeszcze trefiom istne cuda, jak zeszły szwortek rano:
 |
| Moja sosna przed chałpom |
Po druge przeszła mi ryma i kucanie. Trocha zetrwało i żech nawet myśloł, że misiezdo puca wypluja, ale już je dobrze. Ło jak to dobrze!
Po czecie (a trza to brać cuzamyn z piyrszym i drugim) mimo, że boł we styczniu fest mroz, jo boł tydziń na rewiyrze, a reszta cielotki miała feryje i siedzieli my we chałpie, rachunek za gas, kerym polymy, niy boł fest srogi. (Jak wtoś je pieronym wrazidlaty i musi wiedzieć, to muszymy zabulić 550 zł.)
Po szworte złotek doś tak sie trzimie, dyć i piniondze coby borg za chałpa łoddać tyż tyn miesionc niy bydom za wielke.
I mog bych tak kwolic dalij, ale na dzisiej styknie.
S Panym Bogiym!
Brak komentarzy:
Prześlij komentarz