Podle Mateusza:
Kiej Jezus narodzioł sie w Betlejym w Judei za Heroda, toż myndrcy ze wschodu przyjszli do Jerozolimy i pytali: Kaj je nowo narodzony Krol żydowski? Przifilowali my Jego gwiozda na Wschodzie i przytargali my sam, coby Mu łoddać pokłon.
Jak to usłyszłoł krol Herod, wystrachoł sie pierońsko, a s nim cołko Jerozolima, zawołoł wszyjskich arcyksiyndzow i wyuczonych, coby ich wypytać, kaj mo sie urodzić Mesyjosz. Ci mu łodpedzieli: W Betlejym judzkim, bo tak stoji napisane u Proroka: a ty, Betlejym, ziymio Judy, niy je żeś łostatnie ze wszyjskich ważnych miast Judy, dyć s ciebie wyńdzie władca, kery bydzie pastyrzym ludu mego, Izraela.
Wtedy Herod zawołoł po cichu myndrcow i wywiedzioł sie łod nich szczegółowo ło cajt ukozanio sie gwiozdy. Posłoł ich do Betlejym i pedzioł: Tam idźcie i tam pytejcie ło Bajtla, a jak Go znojdziecie, dejcie mi znać, coby i jo mog iś sie Mu pokłonić. Krole mu łodpedzieli: ja mhm i ruszyli dalij.
A dyć zaś gwiozda, kero widzieli na Wschodzie leciała przed nimi, aż sie zahaltowała nad placym, kaj boł Bajtel. Jak łoboczyli gwiozda, festelnie sie uradowali. Wleźli do chałpy i łoboczyli Bajtla s jego Mamulom, Maryjkom; legli gymbom na ziym i łoddali Mu pokłon. Łotwarli i podarowali Mu swoje gyszynki: złoto, kadzidło i mira.
Na spaniu dostali cynk, coby niy jechać już do Heroda i inakszom drogom pojechali curik do sia, do swego hajmatu.
Łostońcie z Bogiym!
Brak komentarzy:
Prześlij komentarz