Po ślonsku

Jak łostatnio byli u nos pszociele z Poznanio, to mie sprzezywali czymu tak rzadko pisza po ślonsku. Łoczywiście wszystko zwaloł żech na Afro, bo łona zaś godo, że jak pisza po ślonsku, to ij sie wolnij czyto, a łona je szybko dziołcha i niy mo tyla cajtu. :-)

Tak mi sie tyż spomniało, że jak pora lot tymu boł żech u nich w Poznaniu i jeszcze przyszli do nich jejich znajomi - rodowite Pyroki, to porząd mi znokwiali cobych godoł po naszymu.

Je coś takigo, że ludzie kerzy som zakotwiyni w swoich małych łojczyznach, majom sporo życzliwości do inkszych w podobnyj sytuacji.

Pamiyntom jak tyż pora lot tymu nazod jeździyli my na wczasy na Kaszuby, to na tyn przykład w Kartuzach, jak we sklepie godali po kaszepsku, to jo nic niy mog spokopić. Ale tyż jak żech sie przyznoł, że jo je Ślonzok i tyż poradza godać swoim jynzykiym, to zawsze mie poważoli i byli życzliwi.

Jo tyż fest inkszym pszaja. Jak miołech projekt na Podhalu, to niy umiołch sie nasuchać góroli (i jeszcze jak mi górole dach robiyli to tyż, hej).

Trza nom te nasze regionalizmy pielyngnować i niy dać sie tak do końca spolonizować. :-)

Łostońcie z Bogiym

Andrzej