Dzisiej bydzie zaś trocha ło naszych ślonskich sprawach. Skuli tego byda sam łonaczoł po naszymu. Co niy znaczy wcale, że moja pisanina je yno do Ślonzokow. Inksze tyż mogom sie poczytać. Zapraszom !
Jak ftoś miyszko w Chorzowie, w Glyjwicach, na Świonach, w Katowicach, czy nawet w Altreichu abo w innym łokolicznym mieście, je to dlo niego łoczywiste. Jak ftoś przyjyżdżo skondiś to czasym sie dziwuje, że u nos niy idzie sie pomiarkować, kaj jedne miasto sie zaczyno, a kaj kończy. Bo my sam wszyscy miyszkomy do kupy pora milionow ludziskow.
Łod chyba ponad 10 lot trwo u nos dysusjo na tymat ślonskij aglomeracji. Roztomajte mondre gowy łosprawiajom, łosprawiajom i łosprawiajom. Tyla, że niy wiela z tyj godki je profitu. Kożde miasto je na prawach powiatu i w kożdym rzondzi Prezydynt - i dobrze.
Ale my miyszkańce skuli tego że żyjymy tak wszyjscy do kupy, momy czasym sroge problymy. Cum bajszpil chcesz jechać busym, musisz dować pozor jaki kasujesz bilet, bo niby momy KZK GOP, czyli taki zwionek coby aftobusy boły jednake, ale niy poradzom sie dogodać i niy wszyske miasta do tego noleżom. I tak samo je w innych dziedzinach. Wszyscy wiedzom, cuzamyn byłoby tonij i sprownij, a niystety nasze prezydynty kożdy ciongnie w swoja strona i tyla.
Pora lot tymu probowali tymu zaradzić i powołali taki twor GZM Silesia, ale zaś niy wszyjscy, ino 14 miast. No, ale dali niywiela z tego wyniko, bo porzond sie ino wadzom.
Terozki wymyślyli, że cza tak zrobić coby sejm uchwalił ustawa ło aglomeracji. No toż wczoraj jedyn poseł przywioz projekt ustawy do deliberowanio z naszymi prezydyntami. Ja, ale z tego coch sie dowiedzioł, chopa spieroniyli i pedzieli, że ta ustawa moge sie na hasiok wyciepać.
Toż jak tacy mondrzy, to czymu tego projektu sie sami niy wymyślyli i niy podciepli kerymuś z naszych posłow. Za to zaś majom na kogo zwalić, czymu nom ta Silesio niy funguje.
Terozki wymyślyli, że cza tak zrobić coby sejm uchwalił ustawa ło aglomeracji. No toż wczoraj jedyn poseł przywioz projekt ustawy do deliberowanio z naszymi prezydyntami. Ja, ale z tego coch sie dowiedzioł, chopa spieroniyli i pedzieli, że ta ustawa moge sie na hasiok wyciepać.
Toż jak tacy mondrzy, to czymu tego projektu sie sami niy wymyślyli i niy podciepli kerymuś z naszych posłow. Za to zaś majom na kogo zwalić, czymu nom ta Silesio niy funguje.
Po mojymu, jakby nasze prezydynty richtich chcieli, to i bez dodatkowyj ustawy mieliby my sam porzondne gospodarzynie na poziomie cołkij aglomeracje.
Jo tam niy wiym, czy ta nowo ustawa je dobro, czy niy, ale do pierona, cosik mi sie zdo, że poseł mioł recht, jak pedzioł, że ustawa pisali dla miyszkańcow, a niy dlo prezydyntow.
Łostońcie z Bogiym
Brak komentarzy:
Prześlij komentarz