Czytanie z Ksiyngi Proroka Izajasza
Rzeknijcie zafrasowanym: "Ôdwagi! Niy strachejcie sie! Ôto wasz Bŏg, ôto pōmsta! Przyłazi Bożo ôdpłata; Ôn sōm przichodzi, by wŏs zbawić".
Wtynczŏs ôtworzōm sie ôczy ślepcom, a guche zacznōm słyszeć. Wtynczŏs kulawy wyskoczy, jak lelyń, a jynzyk niymowōw wesoło wykrziknie. Bo wyszpricuje woda na pustyni i bydom loły sie strumyki na stepie. Spieczono ziymia zwyrtnie się w pojezierze, spragniōny kraj we krynice wody.
Czytanie z Listu Świyntego Jakuba Japostoła
Bracia moji, niych wiara waszŏ w Pona naszego, Jezusa Krystusa uwielbiōnego niy mŏ wzglyndu na ôsoby.
Bo jakby prziszoł na wasze zgrōmadzynie człek ôblyczōny we bogate szaty, ze pierściyniami na rynkach i prziszoł tyż człek biydny, w zamazanych galotach, a wy zerkniecie na bogatego i powycie: "Ty sie sam siednij we piyrszyj ławce", a do biydoka powiecie: "Idź tam do zatku, a tu niy zawŏdzej", to czy niy czynicie różnic miyndzy sobōm i niy stŏwŏcie sie ôszkliwymi syńdziami?
Posuchejcie, bracia moji roztomili! Czy Bŏg niy wybroł biydokōw tego świata na bogoczōw we wierze i na tych, co erbnōm Jego krōlestwo, ôbiecane tym, kerzy Mu pszajom.
Ôstōńcie z Bogiym
Brak komentarzy:
Prześlij komentarz