Ślōnzok we Lizbonie

Już my wrōciyli curik, ale we tyj Lizbonie, to jõ sie czuł, jak w dōma.

Po piyrsze mieli tam banki, blank take, jak u nos "9" na Chebziu, abo jak my za bajtla jeździyli ze Helynki do Stolarzowic.

W lizbońskij bance

Tyn motorniczy, to jeszcze sam do dzisiej krynci tymi korblami, jak najynty.

We katedrze to jedna kaplica - poradzicie się to forsztelować - je poświęcono naszyj ślōnskij Anie. Ja, tyj co do nij jeżdżymy na pońć na Annaberg. 

Kaplica świyntyj Any

To, co mie nojbardzij zadziwiło, to we muzeum archeologie żech znod dynkmal naszego Nypomucka. Tego samego, co stoji u nōs na Halymbie, jak się zaczyno ulica Młyńsko. Dyć to nasz praski świynty, kerego utopiyli we Wełtawie. Skōnd ôn się wziōn na drugim końcu kontynyntu?

Nypomucek

Trza pedzieć, że jeszcze jedna rzecz majōm blank, jak u nōs na Ślōnsku. Pobudowali sie sam normalne szole. Dziwne je ino to, że u nōs szolōm sie jedzie na dół, a u nich do gōry.

Szola Santa Justa

Jõ Wōm gōdōm, we tyj Lizbonie to jõ sie czuł, jak w dōma.

Ôstońcie z Bogiym