Odpust

Zeszło niydziela u nos na Halymbie my mieli łodpust.

Łodpust - fotka z 2013

S tym łodpustym to je sprawa doś skomplikowano. No bo tak: Naszo fara mo we mianie "Boże Narodzynie". Ale to je take wielge świynto, że ło łodpuście żodyn by wtedy niy pomyśloł. Trza tyż na to popatrzeć z tyj strony, że jak sie ludzie pojedzom siymiyniotki, ryby, makowek i moczki, to fto by tam jeszcze kupioł łodpustowe pierniki?

Skuli tego, że żeby boło Boże Narodzynie, nojprzod 9 miesioncow przodzi musiało być Zwiastowanie, czyli Świynto Paniynka zaczła być przi nadziei. Sie porachujcie - za trzi świerci roku bydzie Wilijo. I to właśnie u nos świyntujymy!  

Jak świyntujymy łodpust?

We kościele idzie iś na Suma, a po połedniu jeszcze je niyszpor.

Kole kościoła momy romel. Na budach idzie kupić paspatrony do szczylanio, roztomajte graczki, balony abo fyrloki do bajtli. A jo nojbardzij lubia iś na sztand do Widerow i sie kupić makrony, kulki, pierniki i inksze maszkety. 

Łodpustowe maszkety

 Ale to je dobre po połedniu s kawom. Ale to je dobre!

S Panym Bogiym