Jo, łojciec

Wczoraj boło ło mojim łojcu, toż możno trza tyż naszkryflać ło mie, bo jo tyż je łojcym. 

Jaki żech je, to trza by spytać mojich synow. 

Piyrsze take na fest doświadczynie bycia tatom mioł żech w lazarycie zarozki po tym, jak sie urodził nasz piyrworodny. Ela po cesarce boła jeszcze bamontno, jak żech przijechoł naszym maluchym na porodowka. Zresztom jo som tyż boł cały fort. Posłali mie do izby w lazarycie, kaj były same bajtle i jedna hebama dała mi do rynki take małe zawiniontko i pado, że to je moj synek i mom go zaniyś do mamy - miała kobita łodwaga! 

A jo go wzion na rynce i żech nios bez taki duuuugi korytarz i boł żech wtedy nojdumniejszy łojciec na cołkim świecie.

Niy dugo po tym, tak sie złożyło, żech łostowoł z kilkumiesiyncznym bajtlikym som w doma na łikynd, bo mama jechała do Łopola na załoczne sztudyrowanie. Babcia boła w łodwodzie, ale dowali my se rada we dwojka sami: mały sy mnom, a jo s nim.

Jak sie narodzioł nasz drugi synek, tyż żech sie fest radowoł. Pamiyntom, że ło tym, że spodziywomy sie drugego dzidziusia, moja ślubno pedziała mi, jak żech wrocioł z ponci do Rzymu.

Modszy bracik boł zowżdy bardzij miglanc. Jeszcze niy łazioł, a już piyrszy roz tak wsadzioł starszymu do kichola swoje maciupke paluszki, że Łukaszowi puścioła sie krew.

Braciki jednak doś dugo ze sobom kolegowali. 

Wczasy w 2003

U nos na łogrodku, póki łoni za fest niy wyrośli, a jo jeszcze się niy postarzoł, we trzech grali my fusbal abo w co inkszego. Nauczołch ich pyndalować na kole i szusować na nartach (tu sporo pomogła tyż jedna ciotka).

Dzisiej tyn starszy wiyncyj je na zolytach, niż w doma. Modszy, niby bajtel, a już taki srogi, jak jo.

Wyrośli już te nasze chopcy. Mimo, że jo niy ma łojciec idealny myśla, że trocha dobrych rzeczy tyż łody mie erbli. Jak na razie niy mom sie ło co gańbić. 

Łostońcie z Bogiym