Pora dniy tymu zrodzioła sie festelno haja, bo chachary zamalowały dwujynzyczne nazwy miejscowości, kere to tu, to tam zdarzajom sie u nos na Ślonsku.
Niy tak downo som żech sie nawet na kwila zatrzymoł autym, jak żech jechoł curik z Kyndzierzyna, coby sie tako fotka klipsnoć:
 |
| Goszyce - Goschütz |
Nie poradza spokopić, jak coś takego może komuś zawodzać.
Dyć na tych ziymiach poraset lot rzondziyli Niymce i wiela z nich sam miyszkało. Jak kończoła sie wojna kupa snich Ruske (Poloki tyż w tym pomogali) wyciepli za Łodra. Byli jednak i tacy, co łostali. Bez cołko komuna musieli sie niy przyznować do tego, że czujom sie Niymcami. Moj jedyn ujek - Werner i jego brat Adolf łostali przi swoich mianach, jake im na krzcie dali. Moj inkszy ujek Józio - to żech sie dopiyro dowiedził niy tak downo - tak richtik u PonBóczka to sie nazywo Erwin.
Dyć ponoć już 25 lot miyszkomy w wolnyj Polsce, kaj zdałoby sie, że kożdy: Polok, Niymiec, Ślonzok, a tyż Cygon, Turek, Italioniec abo Afrykaniec i blank kożdy może sie czuć, jak u siebie w doma.
Czy ta naszo Polska richtik mo w powożaniu wszystkich swoich łobywateli?
Łostońcie z Bogiym!
DO ŁOJCZULKA (Ojcze Nasz w gwarze)
OdpowiedzUsuńŁojczulku świynty keryś jest w niebie
Dzisioj my wszyjscy rzykomy do Ciebie,
Wiysz że Ślązoki dycki Cie chwolom,
I Twe królestwo zachować wolom.
Niych Twoja wola zowdy tu bydzie,
Bo przez nia durch nom pomogosz w biydzie.
Twa wola musi być tukej i w niebie,
Łona nom sprzijo w kożdyj potrzebie.
Dej nom chlebiczka ,tego dziynnego,
Bo wiysz że ciynżko wyżyć bez niego.
Bez ta modlitwa łodpuść nom winy,
A my i innym tyż łodpuszczymy.
Sprow by nos nigdy niy kisiył dioboł,
I coby kożdy Ciebie szanowoł.
Łod zła wszystkigo wybow nos Panie,
Ło to Cie proszom Ślązoki-amen!
Niy znoł żech tego. Dziynki!
Usuń