Wieczorno przechadzka

Lubia sie tak na wieczor przyńś.

Wiycie, cołki dziyń w robocie siedza przy klawiyrze. Niy, jo niy ma muzykont - klawiyr ze komputra. To cza trocha stare kości rozruszać.

Jak mie moja pośle po chlyb, to jo leca na zadek do Gerlacha. To je taki gryfny szpacyr.

Tak sie ida i musza fest dować pozor, bo sam u nos Śrybno, ze drugij strony Spiżowo, a tam potym dalij Złoto to łone ino z miana som fest frechowne. Tak po prowdzie to to wszyjsko drogi gruntowe, a w nich dziura na dziurze i gibko idzie wlecieć do marasu. Ale przinajmnij som sam latarnie i cosik widać. Za to łod azylu, bez Kłodnica, kole mojego bloku, kaj żech sie wychowoł i konsek dalij, to je ćma, jak niy powiym kaj (bo kijeś żech usłyszoł, że tako godka to je rasizm). No to ida po łomacku, coby kajsik sie niy wykopyrtnońć.

Richtik fotka z mojij przechadzki

Jak tak sie ida na wieczor to poza tym, że moga rozuszać stare kości, to jeszcze trza sie tyż dotlynić. Tera w jesiyń, jak już je zimno i ludziska zaczli hajcować, to z kożdym dychym jo je coroz bogatszy w roztomaite minerały i inksze piyrwiastki. Mom tera pełne puca wonglo, roztomajtych przepolonych plastikow, łopon i inkszych paskudztw. Dziynki tymu niy musza łykać tych medykamyntow, co to porzond reklamujom, że bez nich to mie ino bydzie żgało, łomało, dostana zatwardzynio abo morzyska, hercklekotow i wylecom mi zymby. I to wszyjsko za darmo.

Lubia sie tak na wieczor przyńś.

Łostońcie z Bogiym!