środa, 9 maja 2012

Cholonek

Łobejrzelimy se wczoraj z mojom ślubnom Cholonka w TVP Kultura. 
Leciało, to my se łobejrzeli, bo czymu niy. 

Wcześnij jakoś nom sie niy trefioło, coby pojechać do tyjatru Korez i podziwać sie na cyrkuśnikow na scynie. Ponoć do tyjatru na tyn szpas przyjszło już łod 2004 roku siedymdziesiont sztyry tysionce (74 000) ludziow.

W telewizorze to niy ma to samo, ale lepij tak, jak wcale.

Bez piyrsze poł boło kupa śmiychu. Możno i boło trocha czasym za fest sorońsko, jak na moje czucie. Ale co poczońć, cza wziońć, że tak sie to Janosch wymyśloł i dobrze. Moi lubyj jeszcze tyż przeszkodzało, że porzond piyli gorzoła. Choć to niy cołkim je prowda, bo piyli tyż piwsko.

Druge poł spektaklu to już nom do śmiychu niy boło. Ja, co poradzić, niy mieli my sam prostego życio. I coby człowiek niy wybroł, zawsze łod kogoś po zadku łoberwoł.

Niby to boła fikcjo literacko, ale jo na serio mom ujka, kery boł krzczony przed wojnom jako Adolf, choć możno coś żech pomyloł, bo łod bajtla go znom, jako ujek Józio. Skond inond bardzo fajny facet i ino my łoba w całyj familyji momy broda (co jedna, to bardzij siwo).

Jo sie tam na wielkij sztuce niy znom, ale coś w tym spektaklu boło - jakeś druge dno, jakeś symbole, jakeś niydopowiedziane słowa. Skojarzoło mi sie tyż, niy wiym czymu, z Prymitywizmem Nikifora.

Bardzo piyknie grali aktorzy, czasym nawet z festelnym poświyńcyniym. Na tyn przikład Świyntkowo musiała zmarasić sie swoja szmata do podłogi czekoladom, jak wyciyrała po bombonie gymba Tekli. No ja, ale "z niczego niy ma nic".

Coby tyż niy pedzieć wszyscy dobrze godali po ślonsku. O "Pardonks", za wyjontkym Detleva. I nawet chyba niy chodzi do końca ło to, jake używali wyrazy, ale ło ton głosu, modulacja, akcynt. Myśla, że wszystke aktory (niy liczymy Detleva), kerzy grali we wczorajszyj wersji telewizyjnyj, byli Ślonzokami z urodzynio. Bołbych fest ździwiony, jakby sie łokozało, że keryś poradził sie tak wyuczyć.

Dobra, niy byda wiyncyj pisoł, bo jak godała Świyntkowo, czytanie człowieka łogupio, a jo niy chca Szanownym Czytelnikom krziwdy robić.

Łostońcie z Bogiym

Brak komentarzy:

Prześlij komentarz

Etykiety

zdjęcia (980) wiara (550) podróże (411) polityka (325) Pismo Św. (269) rodzina (269) Śląsk (214) humor (206) po ślonsku (187) historia (174) Kościół (157) praca (139) człowiek (135) sprawy społeczne (124) Halemba (122) zabytki (114) muzyka (84) gospodarka (76) książka (75) Ruda Śląska (70) Jan Paweł II (68) ogród (68) filozofia (67) Grupa Poniedziałek (66) sport (57) dziennikarstwo (44) miłosierdzie (40) biurokracja (39) film (33) święci (30) muzeum (27) środowisko (26) varia (24) Papież Franciszek (21) Szafarz (18) teatr (16) św. Jacek (15)