sobota, 9 marca 2019

Biblia po ślōnsku 42

Czytanie z Ksiyngi proroka Izajasza

Tak gŏdŏ Pōn Bōg:

"Wrzeszcz na cołke gardło, niy ustŏwej! Podniyś twōj głos, jak trōmba! Wytknij mojimu ludowi jego niygodziwości i domowi Jakuba jego grzychy! Sznupiōm za Mnōm dziyń za dniym, kcom spokopić moje drōgi, jak nacyjo, kero pszaje sprowiedliwości i niy mŏ za nic prawa swojigo Boga. Pytajom Mie ô sprowiedliwe prawa, kcom być blisko z Bogym:

"Czamu my pościyli, a Tyś niy wejrzoł? Umŏrtwiŏli my sie, a Tyś tego niy uznoł?"

Toż jak przijdzie dziyń waszego postu, wy sie zawsze znojdziecie inkszo robota i dokuczocie wszyjskim waszym arbajciŏrzom. Toż pościcie, a sie przi tymu wadzicie i spiyrocie, i walicie piyńściami. Niy poście tak, jak to dzisiej ônaczycie, coby było słychać wasze larmo aże w niybiesiech.

Czy to je post, jaki Jŏ uznŏwōm, dziyń, w kerym sie człek umartwio? Czy zwieszynie gowy, jak zitowie i legniyńcie sie na worku z hasiym - czy tymu dŏsz miano postu i to bydzie dziyń, kerymu pszaje Pōn?  

Dyć niy ma to post, kery Jŏ wybiyrōm: roztargać kety zła, rozwiōnzać wyndzeł niywoli, wypuścić na fraj biydokōw, połōmać cołke jarmo; podzielić sie chlebym ze głodnym, do dom wpuścić biydnych wandrusōw, jak ftoś je sagi, to trza prziôdziać i niy udŏwać gupigo, jak widzisz kamratōw.

Miasteczko namiotowe dla uchodźców w Barcelonie - 04.2018


Wtynczŏs twoje blyndowanie pokŏże sie jako żarza i gipko rozkwitnie twoje zdrowie. Twoja sprowiedliwoś pudzie przed tobōm, a za tobōm Pōńsko kwała. Wtynczŏs zawołŏsz, a Pōn ôdpowiy, bydziesz potrzebowoł pomocy, a Ôn rzeknie: "Dyć żech je!"


Ôstōńcie z Bogiym


Brak komentarzy:

Prześlij komentarz

Etykiety

zdjęcia (2555) wiara (1072) podróże (894) polityka (690) Pismo Św. (675) po ślonsku (440) rodzina (400) Śląsk (389) historia (371) Kościół (344) zabytki (313) humor (294) Halemba (261) człowiek (233) książka (203) praca (203) święci (187) muzyka (184) gospodarka (169) sprawy społeczne (169) Ruda Śląska (138) Grupa Poniedziałek (111) ogród (106) filozofia (104) Jan Paweł II (103) Covid19 (89) miłosierdzie (82) muzeum (76) środowisko (76) dziennikarstwo (73) sport (73) film (66) wojna (55) biurokracja (54) Papież Franciszek (53) Szafarz (43) dom (38) varia (36) św. Jacek (31) teatr (29) makro (7)