piątek, 22 czerwca 2012

Fusbal

Ja, jo wiym, że Poloki już z Ełro wylecieli z wielkim hukym. Niy ma co beczeć. Roztomajte graczki na tym polegajom, że jedyn wygrywo, a drugi przegrywo. Franc sie staroł, jak mog, a tera wszyscy na nim psy wiyszajom.

Tak czy inaczyj, radujmy sie dali tym Ełro, bo je czym. Ludziska posjyżdżali sie do nas z cołkij Ełropy i niy poradzom sie nadziwić, że u nos je szfarnie.

Za chwila szpil w Gdańsku, kaj bydom grać Niymce z Grekami. Łobejrzymy, jak bydom sie fiksować. Możno zaś keryś, jak wczoraj CR7, trefi w supek abo w lata. A jak niy bydom poradziyli szczelić tor, to na koniec - elwry, bo tera już keryś musi wygrać.

Przed chwilom pedzieli, że łoba nasze Ślonzoki: Podolski i Klose bydom grali. Byda im kibicowoł. Możno keryś z nich piźnie jako piykno buda po cyntrze z kepki prosto w łokynko. Winszuja im tego.

Za bajtla na placu my tyż zawsze fusbal grali. Jedna buda my mieli piaskownica, a drugo hasiok. Cza boło dować pozor coby ludziom za prawym ausym szybow w łoknach niy poczaskać. Z lewym ausym tyż boł problym, bo bal poradzioł nom wlecieć do Kłodnice. Ciynżko go boło potym chycić, bo do tyj smołowatyj, śmierdzoncyj belowy niy szło wlyź.
Jak sie w końcu bal wyciongło to żodyn niy chcioł potym cyntry na kepka.

Łod czasu do czasu grali my tyż wety z innymi placami.

Jo tu tak fandzola, a tam sie już szpil zaczyno. Musza kończyć.

Łostońcie z Bogiym!

1 komentarz:

Etykiety

zdjęcia (2555) wiara (1072) podróże (894) polityka (690) Pismo Św. (675) po ślonsku (440) rodzina (400) Śląsk (389) historia (371) Kościół (344) zabytki (313) humor (294) Halemba (261) człowiek (233) książka (203) praca (203) święci (187) muzyka (184) gospodarka (169) sprawy społeczne (169) Ruda Śląska (138) Grupa Poniedziałek (111) ogród (106) filozofia (104) Jan Paweł II (103) Covid19 (89) miłosierdzie (82) muzeum (76) środowisko (76) dziennikarstwo (73) sport (73) film (66) wojna (55) biurokracja (54) Papież Franciszek (53) Szafarz (43) dom (38) varia (36) św. Jacek (31) teatr (29) makro (7)