A boło to tak:
Pora tydni tymu, nasz cajtung Dziynnik Zachodni rozpisoł w internecie take welowanie na Ślonzoka, kerymu nojbardzij pszojymy. Tak po prowdzie to szło ło takego, kery nos Ślonzkow nojbardzij trzymo cuzamyn do kupy.
Pora zacnych człekow w te konkury boło zgłoszonych: i politycy, jak Wojciech Korfanty, i sportowce, jak Gerard Cieślik, i przemysłowce, jak Karol Godula, i poety, jak Joseph von Eichendorff, i biskupy, jak Herbert Bednorz. Wszyjskich razym 55 chopow i babow.
No i dzisioj w połednie się łokozało, że welowanie wygroł:
 |
| Św. Jacek z kaplicy w Kamieniu Śląskim |
św. Jacek
Ja, jo wiym. Nikerzy majom za złe, że w łostatnich dniach tego karlusa, co go zwali "Lux ex Silesia" poparło nawet Radio Maryja i misiezdo, że skuli tego mu supki podskoczyli. Jo sie nawet chichroł som z siebie, że to je chyba piyrszy taki szpas, że broł żech udzial w jakijś akcji przez ta lajera popychanyj.
Niy ma sie jednak ło co wadzić, bo fto, jak fto, ale św. Jacek to je na mur-beton taki Ftoś, bez wielge "F", kery Ślonzokow trzimie w jednyj ferajnie i ślus.
Jo sie tak czy inaczyj festelnie z tego raduja, bo św. Jackowi fest pszaja, ło czym żech sam już pora razy spominoł.
Łostońcie z Bogiym!
Brak komentarzy:
Prześlij komentarz