Barborka inakszyj

Dyć jo zawsze myśloł, że Barborka to ino take nasze ślonske świynto.

Łod bajtla pamiyntom, jak mie w tyn dziyń budzioła górniczo łorkestra, kero grała pod blokym na przeciw.

Orkiestra górnicza

A tu sie łokazuje, że jak latoś jo rajzowoł do Kelec i zawitołch do klosztoru na Karczowce, to łod progu poczuł żech sie jak w doma, bo witała mie tam Świynto Barborka.

Św. Barbara z Karczówki w Kielcach

Nawet wyglondo, jakby boła wyrzeźbiono w wonglu. Łokazało się, że to niy wongel, a figura z galeny. Sam we Kelcach górniki fedrowali rudy łołowiu już we siedymnostym wieku, a możno i wcześnij. I ta Barborka je misiezdo nojstarszom, jako żech w życiu widzioł, bo ponoć z 1646 roku.

Potym żech sie jeszcze dowiedzioł, że miyndzy innymi w Kelcach ze 150 lot późnij działoł Stanisław Staszic - gość fest zasłużony dlo gorniczyj roboty, kaj łotwar Szkoła Akadymiczno-Górniczo, a tera je patronym AGH we Krakowie, kaj sie na sztajgra szkoloł moj śp. krzestny i moja ciotka.

Jakby tego boło mało, to pora dni tymu chcioł żech łobstalować spotkanie z jednym moim kamratym co działo w gazownictwie. A łon mi pado, że chyntnie mie trefi, byle niy w Barborka, bo mo fraj. No i wtedy żech sie kapnoł, że ci co fedrujom gaz i ropa to przeca tyż górniki i tyż Świyntyj Barborce pszajom.

Teren górniczy - gaz ziemny

Toż Świynto Barborko rzykej za wszyjstkimi górnikami na cołkim świecie, kerzy roztomajte skarby spod ziymi dlo nos fedrujom!

Łostońcie z Bogiym