Czytanie z Ksiyngi proroka Izajasza
Tak gŏdŏ Pōn, kery ôtwar droga bez morze i ściyżka bez festelne wody; kery przekludziōł wozy i konie, ja i sroge wojsko; upadłe już niy stanom, zgaszone, jak knotek ôstali zdmuchniyńci.
Niy spōminejcie tego, co bōło, niy medykujcie ô starych czasach. Dyć Jŏ wyônaczuja rzecz nowo; prawie sie zjōwio. Dyć ij niy poznŏwŏcie? Tyż ôtworza droga na pustyni, ścieżki na bezludziu. Bydōm Mie sławić polne zwiyrzŏki, szakale i strusie, bo na pustyni wypuszcza wody i rzyki na ôdludziu, coby mōg sie napić mōj lud wybrany. Lud tyn, kery żech sie utworzōł, bydzie ôsprawiać ô mojij kwale.
 |
| Bydōm Mie sławić strusie |
Czytanie z Listu Świyntego Pawła Japostoła do Filipian
Braty:
Wszyjsko uznŏwōm za strata skuli nojwiynkszyj wartości poznaniŏ Krystusa Jezusa, mojigo Pōna.
Dlŏ Niego wyzuł żech sie ze wszyjskigo i uznŏwom to za abfale, ino co bych mōg pozyskać Krystusa i mōg żech sie w Nim znojś - niy mōm mojij sprowiedliwości, kero pochodzi ze Prawa, a Bożo sprowiedliwoś, kero pochodzi ôd Boga, ôparto na wierze bez Jego poznanie: ta samo moc Jego zmartwycwstanio, jak i udział w Jego ciyrpiyniach - we nadzieji, że jak byda podany na Jego śmierć, dojda jakosik tyż do cołkigo powstanio z martwych.
Niy godom, że już żech do tego doszoł i już żech je doskonały, ale leca, coby tyż chycić, bo i sōm żech zostōł chycōny bez Krystusa Jezusa.
Braty, jŏ sie niy myśla, że jŏ już to chyciōł, ale to jedno działom: zapōminōm ô tym, co bōło, a festelnie sie sztrekuja ku tymu, co na przodku, leca gipko na meta, po prymijo, bo do tego mie na wiyrch wołŏ Bōg, we Krystusie Jezusie.
Ôstōńcie z Bogiym
Brak komentarzy:
Prześlij komentarz