Jako, że fest pszaja Świyntymu Jackowi, bo to nasz ślonski karlus, wybroł żech sie dzisioj do zamku Odrowążów w Kamiyniu Ślonskim, kaj sie synek urodzioł.
Nojprzod żech poszoł gynał do tyj izby, kaj we 1183 roku prziszoł na świat. Dzisioj je tam kaplica we keryj cołki dziyń idzie porzykać przed Przenajświyntszym.
Doł żech tyż kusiola relikwiom Świyntego, co stoły na łołtarzu.
Na pionto poleciołch na Niyszpor do kościoła parafialnego.
Byliście kiejś na Niyszporach w kerych rzykało aż siedmiu biskupow łoroz?
Take cuda dziejom sie ino u św. Jacka!
Po Niyszporach wyleźli my z kościoła i z procesyjom poszli my przed zamek.
Świynty mie na kwila minoł, ale jo go zaroz przegonioł.
Bo nojprzod za krziżym szli chopy, a potym dopiyro cołko familijo Łodrowonżow. Bo trza Wom widzieć, że Świynty Jacek mo jeszcze błogosławionych krewnych: Czesław boł mi sie zdo jego bracikym, a Bronisława kuzynkom.
Za nami szła jeszcze łorkestra, sztandary, biskupy i ksiynża, a na końcu baby.
Zanim my prziszli pod zamek, choć to niy ma daleko, zdonżyli my zmoknoć. Cołke szczyńscie, że żech sie wzion paryzol i jakla. Przed pałacym boła Msza Świynto. Na poczontku loło, jak z cebra i biskup nawet padali, że to je na Asperges i momy sie niy boć, bo to zaroz przyjdzie. I mioł recht, bo kajś kole "Pater noster" wylazło nawet słońce.
Jak my sie już narzykali, a że żech bol troszka głodny, toch sie kupioł na łodpustowym sztandzie konsek kołocza z jabkym, zjod żech go ze smakym i pojechołch do dom.
Łostońcie z Bogiem
Brak komentarzy:
Prześlij komentarz