Tompie, jak pieron

Jak ftoś miyszko na Ślonsku, to niy ma mu dziwne, że czasym chałpom musi trocha pohuśtać.

U nos na Halymbie pod nami fedruje Kopalnia Bielszowice.

KWK Bielszowice

Łod bajtla pamiyntom, że momy tu zawsze take małe, abo i wiynksze czynsiynia ziymi. Bardzij to boło czuć, jak żech miyszkol jeszcze s fatrami na szwortym sztoku.

Groba wongel fedruje i jak pustka pod ziymiom łostanie (a łostowo, bo fedrować z podsypkom żodnymu sie niy chce), to czasym sie to musi rabnońć i wtedy huśto. Te tompniyńcia som pieronym niybezpieczne, bo to poradzi domy popynkać, a nawet blank zwalić, jak to boło niy downo na Karbiu w Bytomiu. Zresztom cołki Bytom i innaksze, kiejś piykne ślonske miasta, bez toż zostały zrujnowane.

Zanim jo zaczon stowiać moja chałpa, to dostoł żech z Okręgowego Urzędu Górniczego pismo, że musza sie wszysko bardzij poankrować, bo sam momy II kategoria szkod górniczych.

Niby chałpa zabezpieczono, niby człek przyzwyczajony, ale to co sie dzieje w łostatnie miesionce to je onmyjgliś.

Na tym przikłod wczoraj wieczor pora minut po dziewiontyj zaś gruchło, jak pieron. Mury aż zatrzeszczały, szolki w byfyju zadźwiynczały, a lampa na gipsdece zaczła sie huśtać. Cosik mi sie zdo, że to boło za festelnie.

Jedyn znajomy karlus podpedzioł mi, że idzie w internecie znojś wyniki z sejsmografu. Wczoraj mieli my 3,0 w skali Richtera, a zeszły miesionc boło nawet 3,3.

Coroz myni mi sie to podobo.

Łostońcie z Bogiym!