wtorek, 11 lutego 2014

Co Poseł pedzieli?

Tak by pasowało, co bych trocha sam napisoł, co żech sie wczoraj łod Posła dowiedzioł.

Poseł ze swoim asystentem Grzegorzem Franki

No toż tak: 

Żodyn niy poradzi spokopić czamu Kaszuby mogom we szkole sztudyrowac po kaszebsku, a my Ślonzoki po naszymu niy mogymy. Ponoć nawet niy ma we Syjmie stenogramow, jak łoni to ftedy przeciśli.

We poprzednij kadyncyji Poseł Plura narychtowoł ustawa na tyn tymat, ale zanim sie coś zaczło, to sie Sejm skończoł. Terozki w tyj kadyncyji juz synek boł mondrzejszy i wciep to zaroz na starcie. Projekt ustawy trefioł do Komisyje łod myjszości, a tam jedna mondro baba wymyśloła, że zanim bydom sie ło to dalij wadzić, trza sie spytać Rzondu, co łon na to. I łod połtoryj roku Tusk ze swojom ferajnom niy poradzom nic z siebie wydusić: ani, że som za, ani przeciw, ani, że majom to w rzici (choć to wszyjscy wiedzom, ino rozchodzi sie ło to, żeby to mieć na piśmie).

To je tera drugi pomys, coby narychtować projekt łobywatelski i go do Syjmu wciepnoć KLIK. Trza skuli tego bez trzi miesionce zebrac co najmnij 100 tysioncow ludziow, kerzy bydom sie chcieli pod tym szkryfnoć. Inicjatywa, podug mie, warto poparcio. 
Musioł żech sie jednak spytać, czy to je prowda, że jak dugo momy III Rzeczpospolito, wszyjske, ale to blank wszyjske łobywatelke projekty ustaw nasz ukochany Sejm bez rozpatrywanio, po piyrszym czytaniu wyciepnoł na hasiok. Nawet wtedy, jak tych podpisow boł cołki milion (spomnioł żech ło tym TUKEJ). No niystety prziznali, że mom recht. Za to tyn chop, co siedzi na powyższyj fotce pod ekranym pedzieli, że tak boło tyż z łobywatelskim projektym ło świyncie 3 Kroli: nojpiyrw projekt ustawy łod zwykłych ludziow wyciepli, ale potym sie Posły zreflektowali i ze skutkym do dzisioj, narychtowali nowe prawo, że jednak momy wolne.
Niy za bardzo wierza, że tu tyż sie Posły zreflektujom, ale lepij łobstalować tako akcyjo, niż siedzieć w koncie i ślimtać.

Poseł Marek Plura

Musza pedzieć, że tyn wczorajszy tref dobrze mie niy nastrojoł.

Jedno rzecz ino, mie po duszy łechtała, że szło posuchać, pogodać i podyskutować po ślonsku. I żodyn sie niy łoglondoł, czy ftoś je posłym, dochotorym, artystom, inżynierym, hajerym czy kim tam te pora ludzi, kerzy przyiszli, boło.

Łokropnie sie jednak boja, że to wszysjko sie ino na godce kończy, a moje chopcy szkoły za kwila pokończom, a w nich ani po ślonsku, ani ło Ślonsku - ło historii, kulturze i tym co nasze, niy usłyszom, blank tak samo, jak my za komuny.

Łostońcie z Bogiym


1 komentarz:

  1. Jo myśla, co na samyj godce ło godce sie niy skończy. To już sie fest rozfechtowało. To boło widać na tym trefie. Prowda, trocha czasu trza by to wszyjstko poukłodać do porzondku. Ale jo wierza co sie to dobrze skończy. Janusz

    OdpowiedzUsuń

Etykiety

zdjęcia (2555) wiara (1072) podróże (894) polityka (690) Pismo Św. (675) po ślonsku (440) rodzina (400) Śląsk (389) historia (371) Kościół (344) zabytki (313) humor (294) Halemba (261) człowiek (233) książka (203) praca (203) święci (187) muzyka (184) gospodarka (169) sprawy społeczne (169) Ruda Śląska (138) Grupa Poniedziałek (111) ogród (106) filozofia (104) Jan Paweł II (103) Covid19 (89) miłosierdzie (82) muzeum (76) środowisko (76) dziennikarstwo (73) sport (73) film (66) wojna (55) biurokracja (54) Papież Franciszek (53) Szafarz (43) dom (38) varia (36) św. Jacek (31) teatr (29) makro (7)