Podug Mateusza:
Jezus pedzieli do swojich uczniōw:
Słyszeliście, że pedziano: "Ôko za ôko a zōmb za zōmb". A Jŏ wōm godom: Niy sztrabujcie zła: jak cie fto piźnie w papel z prawyj, nastŏw sie z lewyj. Tymu, kery chce sie s tobōm prawować ô twōj szaket, dej mu tyż mantel. Ftoś ci kŏże iś s nim tauzyn krokōw, maszyruj dwa tauzyny. Dej tymu, co prziszoł po prośbie i niy wyciepuj tego, co kce wziōńć ôd ciebie na borg.
Słyszeliście że pedziano: "Bydziesz pszoł swojimu bliźniymu", a niyprzŏciela bydziesz niynŏwidziōł.
A Jŏ wōm godom: Pszajejcie waszym niyprzŏcielom i rzykejcie za tych, co wōm robiōm naskwol, cobyście prziszli do tego, że bydziecie synami waszego Ôjca, kery je w niebie. Dyć Ôn sprawiŏ, że klara blyndzi na złych, a na dobrych tyż, i Ôn posyłŏ dyszcz na sprowiedliwych i niysprowiedliwych.
 |
| Ôn sprawiŏ, że klara blyndzi na złych, a na dobrych tyż |
Jak pszajecie ino tym, kerzy wōm pszajom, jakigo geltu sie za to spodziywŏcie? Dyć i chachory tak robiōm. I juzaś, jak piyknie sie kłoniocie ino swojim, toż to niy ma dziwne. Dyć i pogany tak samo ônaczōm.
Bydźcie zaś wy take perfekt, jak perfekt je Ôjciec wasz niybieski.
Ôstōńcie z Bogiym
Brak komentarzy:
Prześlij komentarz