Czytanie z Ksiyngi proroka Barucha
Pociepnij, Jeruzalym, szata smutku i swojij utropy, a ôblycz sie we szumne szaty kwały, kere ci doł na zŏwdy Pōn. Wysztigluj sie w mantlu sprowiedliwości, kero ôd Boga pochodzi, wraź na gowa swoja korona kwały Przedwiecznego! Toż Bōg kce pokŏzać twoja szumnoś wszyjskimu, co je pod niebym. Twoje miano bydzie u Boga na wieki: "Pokōj sprowiedliwości i kwała pobożności".
 |
| Dźwignij sie Jeruzalym! |
Dźwignij sie Jeruzalym! Stōń na gōrce i wejrzij na weschōd, ôbocz twoje dziecka zgrōmadzone na słowo Świyntego ôd weschodu aże do zachodu, rozradowane, że Bōg ô nich pamiyntōł. Wyleźli ôd ciebie piechty, pyndzyni bez wrogōw, a Bōg przikludziōł ich nazot niesionych ze kwałōm, choby na krōlewskim tronie. Dyć uradziōł Bōg wyklepać kożdo wysoko gōra i pagōrki kere sōm ôd zawsze, doły zasypać, do zrōwnaniŏ z ziymiōm, coby bez przeszkōd mōg kroczyć Izrael w kwale Pōna.
Na rozkŏz Pōna lasy i drzewa, kere wōniajōm, bydōm dŏwać ciyń Izraelowi. Toż z radościom przikludzi Bōg Izraela do klary swyj kwały ze pasownōm dlŏ Niego sprowiedliwościōm i miłosierdziym.
Czytanie z Listu Świyntego Pawła Japostoła do Filipian
Bracia:
Wdycki, w kożdyj modlitwie, ze radościom zanosza prośba za wos wszyjskich - skuli waszego udziału we szyrzyniu Ewangelji ôd piyrszego dnia, aże do dzisioj. Dyć mōm ufnoś, że Tyn, kery zaczōn w wos dobre dzieło, dokończy go do dnia Krystusa Jezusa. Toż Bōg je mi świŏdkym, jak fest je mi tesno za wami wszyjskimi we pszoniu Krystusowi Jezusowi.
A modla sie ô to, coby wasze pszonie sie corŏz to bardzij doskonaloło we głymbszym ôbznajōmiyniu i wszelkim wyczuciu dlŏ ôcyny tego, co je lepszejsze, cobyście byli czyści i bez pōmŏwy na dziyń Krystusa, nōpełniyni plōnym sprowiedliwości, kery przinoszymy bez Jezusa Krystusa, na kwała i cześ Boga.
Ôstōńcie z Bogiym
Brak komentarzy:
Prześlij komentarz