Kultura na Śląsku

Wszyjscy wiedzōm, że kultura na Ślōnsku to je krupniok, piwo i grobsko ôrkestra. A jak niy grobsko, to zicpolki kere kcom udŏwać melodie z hajmatu kejsik tam z Bajerōw. Ślōnzŏki sie przy tym huśtajom, kuflami machlujōm i do tego sie jeszcze pośpiywajōm.

I to je ślōnsko kultura, ô keryj wiy cołko Polska.

Skuli tego, że my Ślōnzŏki kcymy naszŏ kultura ôzszyrzać, ôstatnio na gibko wybudowali my sie tako dupno hala, coby krupniŏkōw i piwa wiyncyj sie zmieściyło. Ponoć nawet ftosik wyłōnaczoł, że we tyj nowyj tanc-budzie trōmpety ze ôrkestry fest gryfnie idzie suchać - ponoć nawet lepij niźli we Spodku.

Nowo tanc-buda we Katowicach

Jak my sie już take gmaszysko postawiyli, to my niy sōm sorōnie i zaprosiyli my sie kamratōw do piwa i krupnioka. Zaczli my ôd Wiener Philharmoniker. To tako kapela ôd zicpolek, abo nawet ôd polek bez "zic" ze Austryje. Ponoć im sie podobało i sie kwolyli. 

Jako, że jŏ ślōnskij kulturze fest pszaja, tyż żech sie tam wybroł w ôstatnio niydziela. Na fortyklapie groł synek co sie urodziōł na Kaszubach. Bo wiycie, że my Kaszubom fest zowiszczymy jednyj rzeczy, ale niy aż tak, coby sie swojōm halom niy poasić. Synek wyglōndoł doś licho, ino wosy mioł jak jakiś szarpidrot - na gruba by go niy przijyli, nawet do ôrkestry. 

Leszek na fortyklapie

Zresztom fto by we grobskij ôrkestrze kcioł taszczyć ze sobōm cołki klawiyr. Jakby groł na cyji, to je inkszo gŏdka. Niy idzie pedzieć, czaskoł po tych klawiszach, że aż wiory leciały, a te dwie szolki co je tam widać, to mu aże wleciały rajn - jŏ myśloł, że sie potukom.

Nic żech sie na tyj kulturze niy pośpiywoł. Piwa i krupnioka tyż niy dali, ale sie niy dziwuja, bo majom tam nowe zice to sie chyba bojom, coby im ftosik ich niy poflekowoł.

We Warszawie nic ô tyj naszyj nowyj koncert-halle niy gŏdajōm. Przynajmnij we Telexpressie ani we Dziynniku jŏ nic niy słyszoł. W radijoku na Trójce spōmnieli, ale ino skuli tego, że ftosik wykupiōł reklama, że do tego dociepli sie z kasom z Ojropy.

Jerōnie, zy mie je jednak pieroński gizd i cygon. Przeca drugi program polskigo radijoka transmitowoł to na lajfie. A ponoć ta stacyjo sucho regularnie w Polsce jakeś ôziymnoście ludziow.

A zresztom niy ma sie co na Polŏkōw ôbrażać. Teraz to we Anglie je ich tyla, że na prziszły tydziyń zaprosiyli my sie ferajna z Wyspow: London Symphony Orchestra. Ci sie na pewno na naszych krupniokach i ślōnskij kulturze poznajom.

Ôstōńcie z Bogiym