Wanielijo po ślōnsku #131

Podug Łukasza:

Kiej Maryjka boła fertich z tymi ônymi po urodzyniu Bajtla, podle Mojżyszowego Zokonu, cuzamyn z Józefym przinieśli Jezuska do Jerozolimy, coby Go pokŏzać Pōnu. Dyć tak stoi napisane w Pōńskim Zokonie: Kożdy piyrszy bajtel – synek bydzie poświyncōny Pōnu. Mieli tyż dać na ôfiara pŏrka pultów abo dwie mode cukrowy, jak stoi we przepisach Pōńskigo Zokonu.

Fragment mozaiki z wyspy Gozo

A żoł we Jerozolimie człek, co mioł na miano Symeon. Boł to chop prawy a pobożny i porzōnd czekoł na pociecha Izraela, a Duch Świynty mioł go w zŏcy. Jymu Duch Świynty pedzieli, że niy umyrtnie, póki niy ôbŏczy Mesyjosza Pōńskigo.

Skuli Ducha Świyntego prziszoł do świontynie. I jak rodziciele wlazowali ze Bajtlym Jezuskym, coby ôdprawić s Nim to, co trza boło, ôn wziōn Bajtla do sia, błogosławioł Boga i gŏdoł:

Terŏzki ô Pōnie mogesz mi już dać wziōńć i umrzić

we świyntym spokoju, jak Żeś mi ôbiecoł

Bo moje ôczy zoboczyły Twoje zabawiynie

ker Żeś narychtowoł dlŏ wszyjskich nacyjow

światło na ôświycynie poganow

i kwała Twoich ludziow z Izraela

A Jego ôjciec i matka dziwowali się tymu, co ô Nim gŏdali.

Symeon durś błogosławioł ich i pedzioł do Maryjki, Jego Matki: „Dyć Tyn je wyłōnaczōny na to, coby liczne we Izraelu ślecieli i sie podźwigli i na signal, kerymu bydōm robić naskwol. A Twoja dusza bydzie choby zadźgano ôd miecza, coby wyjszły na wiyrch roztōmajte forsztelowania.

Boła tam tyż proroczka Ana, cera Fanuela ze familije Asera, fest staro omcia. Ôdkōnd boła paniynkōm, ino siedym lot miała chopa, jak potym ôwdowiała. Prawie co miała gyburstag – ôziymdziesiont sztyry roki. Porzōnd siedziała we kościele, bo boła fest pobożno, rzykała cołki dziyń i noc. Przyjszła tyż wtynczŏs do kościoła, kwoliła Boga i wszyjskim, co spodziywali sie wyzwolyniŏ Jerozolimy ôsprawiała ô Jezusku.

Jak już wyłōnaczyli wszyjsko, co trza boło, poszli curik do Galileje, do sia do Nazarytu.

Bajtel zaś rós, boł coroz bardzij mocny i festelnie mondry, a Bosko łaska porzōnd cuzamyn boła s Nim.

Ôstōńcie z Bogiym