Biblia po ślōnsku 1

Czytanie ze Ksiyngi Powtōrzōnego Prawa

Mojżysz tak pedzioł do ludziow:

Spytej sie prastarych czasōw, kere boły dŏwnij, poczynajōnc ôd dnia, jak Bŏg stworzōł człeka na ziymi, spytej ôd jednego do drugigo końca nieba, czy już kejś dzioły sie take dziwy jak tera abo czy fto słyszoł ô czymś na to podanym? Czy słyszoł jakiś nŏrōd gŏdka Boga z ôgnia, jak tyś słyszoł, i ôstoł przi życiu? Czy Bŏg kejś przōdzi prziszoł i ôbsztalowoł sie jedyn nŏrōd ze inakszych nŏrodōw bez dziwy, cuda, znaki i wojny ciynżkōm rynkom i dźwignionym ramiyniym, strasznymi doznoniami, jak to wszyjsko, co wyłōnaczoł tobie Pon, twōj Bŏg, we Jegipcie na twojich ôczach? 

Miarkuj sie dzisiej i wytuplikuj sie w swojim hercu, że Pon je Bogym, a na niebie na wiyrchu i na ziymi na dole niy ma inkszego. Pilnuj Jego praw i nakŏzow, kere jŏ ci dzisiej kŏża suchać; coby ci sie dobrze wiodło i twojim synom po tobie; cobyś przedłużoł swoje roki na ziymi, kero ci na wieki wiekōw dŏwŏ Pon, twōj Bŏg.

Galileja widziano zza Gynyzaretu

Czytanie ze Listu Świyntego Pawła Japostoła do Rzymion

Bracia:

Wszyjscy Ci, kerych prowadzi Boży Duch, sōm Bożymi synami. Dyć niy erbliście przeca ducha niywolnikow, by sie juzaś strachać, ale erbliście Ducha usynowiynio, bez toż mogymy wołać "Abba, Ôjcze!" 

Sōm Duch spōmŏgŏ naszego ducha swojim świŏdectwym, że my sōm dzieckami Bożymi. A jak my sōm dzieckami, to przeca tyż erbnymy, erbnymy po Bogu, tak samo, jak Chrystus; skuli tego, że cuzamyn s Nim ciyrpiymy, toż tyż coby cuzamyn s Nim bydymy radować sie kwałōm.

Ôstōńcie z Bogiym