Kaj mie Polska mo?

Probuja sie łostatnio na powyższo zogwozdka łodpedzieć.

Ja, wiym. Zarozki ktoś rzeknie, że to niy Polska, niy Państwo. Jak już to politycy, jakoś tam partyjo, abo syndzie, abo ftoś tam inkszy. Bo przeca Polska to świyntość, zawsze niyomylno i porzond prawomyślno, kero dbo, ło wszyjskich swojich łobywatelow. A niy yno ło swojich, bo przeca jeszcze "za wolność waszo i naszo".

Niy poradza tego tak spokopić, bo przeca Polska to niy ma ino idea. A zaczynom sie boć, jak Polska zaczyno być ideologiom, abo nawet bożkym. Nikerzy z hasła "Bóg, honor, ojczyzna", ta łostanio przeciepli na przodek, z PonBóczka robiom karykatura, a ło jejich honorze to ani niy byda spominoł.

Państwo Polskie to przeca jego legalnie wybrane władze, na kere jo som tyż welowoł. Na wiyrchu Polski je Prezydent, Parlamynt, instytucje, w tym Sond Nojwyższy, Prymier, Rzond, etc. Jak downij za komuny wszyscy wiedzieli, że władze som wciepane siłom, to żodyn do Polski, jako takij niy mioł pretynsji. A mimo to do dzisioj trza spłacać stare dugi i rekompynsaty za zrabowane przez Państwo dobra.

Toż sie myśla, że moga jednak sie zasatnowiać, kaj Polska mie mo.

Pora tydni tymu Polski Sejm wyciep na hasiok 1 mln podpisow swoich łobywateli, co sie łodezwali za tych nojmniyjszych, kerych dzisoj zgodnie z prawym idzie zabić.

Wczoraj tyn som Polski Sejm pedzioł, że Państwo może sie zgodnie z prawym wziońć konsek mojego gyltaku, kery łod lot szporuja na moja pynzyjo.

I tyż wczoraj Polski Sond Nojwyższy łorzek, że zgodnie z prawym moji ślonskij nacyji niy ma. Co z tego, że łosiymset tysiyncy ludziow zawelowało we spisie, że som Ślonzokami, dyć te przemondrzałe chopy ze stolicy wiedzom lepij.

Może ftoś pedzieć, że po co łoncza te trzi tymaty. Dyś jedyn je światopoglondowy, drugi ekonomiczny, a trzeci bez wiynkzego znaczynia dlo wiynkszości Polokow.

Toż musza Wom pedzieć, że dlo mie to je cuzamyn smutny łobroz noszego państwa.

Polska na mojich łoczach łonaczy prawo, kere mo kajś podstawowe sprawy. Nic sie niy robi z Boskich Przykozań:

• Niy zabijej
• Niy kradnij
• Niy cygoń

Możno mogbych sie na to łodpedzieć, że Polska mo mie kajś. Jo je Ślonzok i nic z takom Polskom niy chca mieć wspólnego. I pewnie wiela takich głosow dzisioj idzie usłyszeć.

Ja, jo je Ślonzok i tyj ziymi nojbardzij pszaja, ale musza pedzieć, że jo je tyż Polok i możno skuli tego to, co sie wyprowio, tak mie boli.

Cosik z tym trza zrobić!

Łostońcie z Bogiym

P.S. Jak ftoś woli sztudyrować po polsku to prosza bardzo: KLIK, bo jo respektuja Polokow.