Na kole

Ludzie złoci! Jak jo wczoraj wyrżnoł na kole.

Po zimie przyszoł czas na rozruszanie starych kości. Jak łońskego roku, zaczon żech zaś pyndalować po lesie. 

Staro fotografio, jak jeszcze chopcy zy mnom rajzowali :)

Wrocom sie wczoraj już do dom i w miejscu, kaj pod liniom ze sztromym niydowno zrobiyli nowo wycinka, leżało na ziymi trocha patykow. Ale dyć to normalno rzecz, jak sie rajzuje po lesie to roztomaite kijoki bele kaj sie poniywiyrajom. Nawet niy wiym, jak to sie stało, ino nogle shaltowało mi na blank przednie kołko i zanim żech cokolwiyk pomyśloł, wykiprowało mie bez kerownica na zol. Tyla ino że żech zdonrzoł wycingnoć rynce, bo inaczyj gichnoł bych prosto na pysk. A musicie wiedzieć, że tera w niydziela ida do krzesnioka na komunijo, to ze starganom gymbom bych piyknie wyglondoł.

Jakoś żech sie pozbiyroł, przinajmij do pozycji siedzoncyj i kombinuja: rynce całe, nogi całe, z gowy krew sie niy leje -  może niy je tak nojgorzyj. Pomacołch sie czy mom wszysko na swoim miejscu, ale ino rynce'ch sie zmarasioł i nawet ich niy połobdziyroł. Dobrze, że boło tam doś miynko, boch sie ani za fest niy potrzaskoł.

No to trza boło jeszcze zrobić szybki przeglond koła. Keta mi niy sleciała i w ogóle zadek boł w porzondku. Trocha gorzyj wyglondol przodek. Szprycha sie wygła w jedna strona, a drot łod szuzblecha w drugo - pewnikiym w tym miejscu wloz tyn pieroński kijok. Niy szło tyż dali jechać, bo szuzblech tar po łoponie. Całe szczynście niy boło pany. Szuzblech żech naciong trocha rynkom i nogom wyklepoł i po leku dokuloł żech sie szczynśliwie do dom. Dziynki Ci Pon Bóczku żech sie niczego niy ajchnoł.

Łostatni roz bez kerownica żech przelecioł za bajtla, zaroz po tym jak żech sie na kole nauczoł jeździć. Znaczy sie już żech umioł jechać prosto, ale jeszcze mi niy wychodzioły skrynty i haltowanie. Jak żech wtedy piznoł w murek z piaskownicy, to koło łostało na placu, a jo furgoł do piosku. Ja, wczoraj mi sie to spomniało.

Ale co tam, dzisiej tyż żech juzaś zrobioł ponad 10 kilosow i wszysko je w porzondku. A jeszcze sie zastanowiom, czy sie nowego koła niy kupić, bo te moje to już je haszpel.

Łostońcie z Bogiym!