Znojdowanie choinki

Jak kożdego roku w sobota przed Wilijom trza sie sprawić jakoś choinka.

Łodkąd my sie wykludziyli z blokow i momy w chałpie trocha wiyncyj placu, kupuja choinka żywo, abo i zdechło, znaczy sie ściynto, ale prawdziwo, a niy plastikowo. Z tych drzewek w ziymi, w doniczce, to nawet dwie z poprzednich lot, rosnom u mie dali w łogrodku.

Po śniodaniu wsiod żech w auto i pojechoł do łogrodnictwa. Już na winklu, przy wjeździe, boła szczałka z napisym "Choinki i fajerwerki". No toż dobrze żech trefioł, tak mi sie zdowało. Na placu pod łogrodnictwym ani jednego auta. Stanołech i wylazuja z mojego, zaglondom rajn ... a tam pusto. Wylazała z budki szefowo, to sie jom pytom:

- Kaj mocie choinki?

- Już niy ma, wczoraj wszyske wypupiyli?

- I co jo tera mom zrobić? Zawsze żech u wos broł choinka, a dzisioj już niy ma?

- Jedźcie do Łoszanta, możno tam jeszcze bydom.

Co boło robić, wloz żech nazod w auto i kombinuja kaj jechać. Nojbliżyj boło do łogrodnictwa kole Bujakowa - downoch tam niy boł. Ino żech ich minoł - zawarte na sztyry spusty. 

Dalij po drodze boł Łoszant, ale go terozki bojkotuja, bo ponoć kożom tam sprzedawczyczkom robić w Wilijo aż do szwortyj. Minołch tyn sklep i wylondowoł żech w Łobi. Moja kamratka z roboty godali dwa dni tymu, że tam jeji chop kupioł drzewko. 

Możno dwa dni tymu nazod to boło tam co wybrać. Dzisiej to już łostaly ino take łoszkupki, że to gańba w doma postawić.

W desperacyji spomniało mi sie, że choinkami handlowali tyż pod Makro. Myślołch, że już kupia jako bądź. 

No jednak na koniec mioł żech szczyńście - łokozało sie, że dzisiej w nocy mieli nowo dostawa piyknych, jeszcze łośnieżonych, bo przyjechały kajś zza Warszawy, jodeł kałkaskich. Niy szkodzi, że ściynto, a niy w donicy. Przynajmnij doł żech rada to zapakować do auta (dobrze, że combi). Z ziymiom, to zawsze jednak pierońsko ciyńżke. 

Ludzie, jak ta choinka zaczła mi już w tym aucie woniać, normalnie bajka.

Wyciong żech z garażu taki stojok, coch go kiejś kupioł, a choina wnios do dom i łodwinoł ze tyj siatki, co ij te gałązki trzymała do kupy. 

Musza pedzieć, że jes piykno. No i z rozmiarym żech trefiol tak na knap: żodno szpica już sie niy zmieści, bo sama mo do gipsdeki ino poł cynta.

We Wilijo bydymy na nij wiyszać glaskugle i lampki, a pod niom domy gyszynki, coby wszyjscy mieli doś radości.

Łostońcie z Bogiym