Wanielijo po ślōnsku #208

Podug Łukasza

Jezus pedzieli do swojich uczniōw:

"Godom wōm, kere suchocie: Przajcie waszym niyprzŏcielōm; dobrze ônaczcie tym, kere wos niynawidzom; bogosłowcie tym, kere na wos psioczom i rzykejcie za tych, kerzy ô wos klachajōm. Jak cie ftoś piźnie w papel, nastŏw mu i drugi. Jak ci ftoś biere mantel, niy broń mu i szaketa. Dŏwej kożdymu, kery cie prosi, a niy rob haje, co by ci doł curik, jak biere twoje. Jak kcecie, coby wōm ludzie ônaczyli i wy im ônaczcie tak samo.

Dyć jak przajecie ino tym, kere wōm przajōm, jako za to bydzie wdziyncznoś? Przeca i grzyszniki przajōm tym, kere im przajōm. I jeśli dobrze ônaczycie tym, kere wōm tyż dobrze ônaczōm, jako za to nŏleży sie wdziyncznoś? I grzyszniki tak samo robiōm. Jako pożyczosz ino tym, ôd kerych spodziywŏsz sie, że ci wrōci , jako za to nŏleży sie wdziyncznoś? I grzyszniki pożyczajōm grzysznikōm, coby mieć tyla samo nazŏd.

Toć wy przajcie waszym niyprzŏcielōm, dobrze ônaczcie i pożyczejcie i niczego sie nazŏd niy spodziywejcie. A wasza nagroda bydzie wielgo i bydziecie synami Nojwyższego, skuli tego, że Ôn jes dobry dlŏ niywdziyncznikōw i ôszkliwcōw. Bydźcie miłosierne, jak Ôjciec wasz je miłosierny. Niy sońdźcie, a niy bydziecie sondzōne; niy potympiejcie, a niy bydziecie potympiōne; ôdpuszczejcie, a bydzie wōm ôdpuszczōne. Dŏwejcie, a bydzie wōm dane; miarom niycyganionōm, ubitōm, uklepanōm i wypełnionōm, że aże sie bydzie przesypować w wasze zanadrza. Dyć ôdmierzōm wōm takōm miarōm, jakōm wy mierzycie.

 Dyć ôdmierzōm wōm takōm miarōm, jakōm wy mierzycie

Ôstōńcie z Bogiym