Ślōnzŏk w Betlejym

Piyrszy rŏz we Betlejym to jŏ boł prawie 3 roki nazŏd we lutym 2018 z naszōm Grupōm Poniydziałek. Nasza pōńć my właśnie ôd Betlejym zaczli i jak kcecie, to Wōm moga trocha ô tym poôsprawiać.

Jak sie rodziōł Jezusek, Betlejym należało do Judeji w Palestynie, kero wtynczŏs boła pod ôkupacyjōm Rzymian. Dzisioj te same Betlejym je w Autonomyji Palestyńskij, kero państwo Izrael ôdgrodziyło ôd sia festelnym betonowym płotym. I wtynczŏs i terŏzki mocka sam je polityki.

Mur graniczny Izrael - Autonomia Palestyńska

Miasteczko je dzisiej muzumańske. Poznać to po tym, że ze minaretów porzōnd puszczajōm jejich rzykania, a we sklepach i na sztandach handlujōm ino chopy. Je sam tyż trocha krześcijōnōw, ale misiezdo corŏz myni.

Na samym rynku Betlejym tyż widać meczet, a po prawyj rynce Cyntrōm Pokoju. Bo kożdy - sam tyż - kce żyć we pokoju. 

Centrum Pokoju w Betlejem

Jak się tukej zwyrtnōńć we drugo strona, to mōmy przed sia nojważniejsze: Bazylika Narodzyniŏ.

Bazylika Narodzenia

Po lewyj stronie katoliki, a właściwie francmany majom swōj kościōł św. Katarzyny.

Kościół św. Katarzyny Aleksandryjskiej

We pojśrodku idzie slyź na doł do grotōw: św. Jozefa, kery czekoł na narodziny, ale tyż św. Heronima, kery sam przełōnaczoł Pismo Świynte na łacina.

Grota św. Józefa

My, jak tyn św. Jozef, tyż czekali, aż bydymy mogli wlyź do Groty Narodzyniŏ. No toż jŏ się zaczōn kryńcić po tych podziymnych korytorzach, bo mie to wszyjsko festelnie interesuje. Na jednym końcu trefioł żech na zawarte dźwiyrza i - gańba sie prziznać - ale zaczōn żech filować bez dziurka ôd klucza. Jak żech kuknōł, to aż mie zatkało.

Przez dziurkę od klucza

Dyć prawie tam boła Grota Narodzyniŏ 

Po jakimś czasie blank ze inkszyj strony my do tego miejsca prziszli. To tukej Jezusek sie urodziōł. 

Miejsce Narodzenia Jezusa

Jakby tego boło mało, we Grocie Narodzyniŏ, zarŏz kole tyj gwiŏzdy mieli my Msza Świynto. 

Msza Św. w Grocie Narodzenia

Toż we miejscu , kaj Słowo stało sie Ciałym, mogli my przyjōńć Ciało Pōna Jezusa we Eucharystyji. Narodziōł sie zaś we Grocie i na ołtarzu.

Dobrze je sie pospōminać, jak my byli we Betlejym. Dobrze je pamiyntać, że Jezus rodzi sie na kożdyj Mszy Świyntyj. 

Ôstōńcie z Bogiym