Czytanie z Ksiyngi proroka Izajasza
Skuli Syjonu niy byda cicho, skuli Jerozolimy niy spoczna, aż jejij sprŏwiedliwoś niy blyśnie jak zorza i jejij zbŏwiynie niy bydzie sie hajcować, jako fakla. Wtynczŏs nacyje ôbejrzom twoja sprŏwiedliwoś i twoja kwała wszyjske krōle. I dajōm ci nowe miano, kere wypedzōm usta Pōna.
Bydziesz urodnōm koronom w rynkach Pōna, krōlewskim diadymym w gości twego Boga. Niy bydōm cie wiyncyj przezywać "Pociepniono", ô twojim hajmacie niy pedzōm "Wydmuchowisko". Za to ci dajōm miano "Moja gryfno libsta", a twojimu hajmatowi - "Moja ślubno". A dyć Pōn ci fest pszaje i twōj hajmat bydzie sie żynić.
 |
| Modo Pani, kero my trefiyli w Hajfie w Izraelu |
Bo jak karlus żyni sie s dziouszkōm, tak tyn, kery cie stŏwioł sie s tobōm ôżyni i jak mody pōn raduje sie s modōm paniōm, tak twōj Bōg uraduje sie tobōm.
Czytanie z Piyrszego Listu Świyntego Pawła Japostoła do Koryntian
Braty:
Roztōmajte sōm dary łaski, a tyn sōm Duch; roztōmajte tyż zorty posługiwaniō, ale jedyn Pōn; roztōmajte tyż na ôstatek ônaczynia, ale jedyn, tyn sōm Bōg, sprŏwca wszyjskigo we wszyjskich.
Wszyjskim zaś ôbjawio sie Duch dlŏ spōlnego dobra. Jedyn erbnōł łod Ducha dar mondrości w gŏdce, drugi poradzi rozpoznŏwać podug tego samego Ducha, inkszy erbnōł dar wiary w tymże Duchu, inkszejszy łaska uzdrowianio bez tego samego Ducha, inkszy dar ônaczynio cudōw, inkszy proroctwo, inkszy rozpoznŏwanie duchōw, inkszy dar jynzykōw i na ôstatek ftoś poradzi te jynzyki tuplikować. Wszyjsko to sprawiŏ jedyn i tyn sōm Duch, kery dŏwŏ kożdymu tak, jak kce.
Ôstōńcie z Bogiym
Brak komentarzy:
Prześlij komentarz