Ewangelijo po ślonsku #31

Podle Jona:

We wieczor w dniu zmartwychwstanio, tam kaj byli ucznie, mimo, że dźwiyrze boły zawarte, bo sie strachali Żydow, prziszoł Jezus rain, stanoł pojśrodku i pado: "Pokoj wom!". A jak to pedzioł pokozoł im rynce i bok. Ucznie sie festelnie uradowali, jak łoboczyli Pona.

W wieczerniku - fragment obrazu A. Cygana

A Jezus zaś im pedzioł: "Pokoj wom! Jak Łojciec Mie posłoł, tak i Jo wos posyłom". Po tych słowach tchnoł na nich i im pedzioł: "Weźcie Ducha Świyntego! Kerym grzychy łodpuścicie, som im łodpuszczone, a kerym zatrzymocie, som im zatrzymone".

Dyć Tomasz, jedyn ze Dwunastu, kerego mianowali Didymos, niy boł wtedy cuzamyn s nimi, jak prziszoł Jezus. Toż inksze ucznie mo godali: "Widzieli my Pona!"

Ale łon im pedzioł: "Ja, mhm. Jak na Jego rynkach niy łobocza śladu gwoździ i niy wsadza palca w dziura po gwoździach i rynki niy wsadza do Jego boku, niy uwierza."

A łoziym dni późnij, kiej ucznie zaś siedzieli rajn w doma i Tomasz s nimi, Jezus prziszoł, mimo dźwiyrzy zawartych, stanoł pojśrodku i pado: "Pokoj wom!" I zaroz pedzioł do Tomasza: "Dźwignij sam swoj palec i pomacej moje rynce. Dźwignij rynka i wsadź w moj bok, i niy bydź niydowiarek, ino wierzoncy".

Tomasz Mu łodpedzioł: "Pon moj i Bog moj!"

Pedzioł mu Jezus: "Tyś uwierzoł bez toż, żeś mie łoboczoł? Błogosławione te, kere niy widzieli, a uwierzyli".

I moc inakszych znakow, kerych niy zapisano w tyj ksiyndze, wyłonaczoł Jezus przi uczniach. Te zaś zapisano, cobyście wierzyli, że Jezus je Mesyjoszym, Synym PonBóczka i cobyście bez ta wiara mieli życie w Jego imie.

Alleluja!