Ślonzok na Bayerach

Boł żech tyn tydziyń na Bayerach. Forsztelujcie sie, że nawet żech na kwila trefioł na Oktoberfest we München. 

Kaj, jak kaj, ale sam, to jo sie czuł, jak u nos na Ślonsku. Godom Wom.

Zarozki, jak my wysiedli z U-bany, boła droga Marii Goeppert-Mayer - blank tyj samyj, co u nos w Katowicach. No bo tyż u nos dziołcha przijszła na świat, zanim erbła Nobla.

Sztrasa w Monachium

Na tym Oktoberfeście to ludziskow boło wpiguły, gorzyj, jak w Katowicach na Stawowyj, ale jakoś my sie znodli.

Piwiarnia Lowenbrau

Blank tak, jak na Halymbie tu tyż porzond używajom koni. Tyla, że u nos konie wożom kartofle, a sam tak samo dary ze pola - kmiel.

Zaprzyng piwny

Cołke szczyńscie, że mieli my łobsztalowane place, bo bez tego, to by my misiezdo łostali łobrusku - tyla sam boło chyntnych na tyn złocisty trunek.

Wyszjske pijom piwo

Pojśrodku sale boło take podwyższynie, kaj grała kapela. Kcecie wiedzieć, jake szło sam słyszeć melodie? Puście sie kiejś naszo telewizjo TVS - gynau take same zicpolki.

Kapela

Chop na klarnycie we piyknym pulowerze groł tak gryfnie, jak kiejś moj świyntyj pamiynci teść we gorniczyj łorkestrze na Pokoju.

Klarnecista

No i na koniec musza pedzieć, że piwo majom sam festelnie dobre. No to pyrsk ludkowie!

Pyrsk!

Łostońcie z Bogiym!