Idzie srogo zima

Dejcie pozor, bo idzie srogo zima.

Skond wiym? Jak to skond? Jak indianery, czyli tubylce, czyli miejscowe Ślonzoki forantujom drewno, to znak, że idzie fest srogo zima.

Dzisioj u mie na placu wykiprowali cołke auto kulokow, klockow i roztomaitych piyńkow.

Jak żech przed szostom przyijechoł z roboty, to już to leżało na trowie.

Łukasz jak badnoł co sie świyńci, to citnoł do lipsty. Jacek groł kijsik fusbal i po mojymo po darymnicy lotoł, a tu mogby sie piykne muskle wyłonaczyć. 

No i co, stary łojciec ino na kwila sie po łobiedzie dychnoł i musioł żech to szpryngnoć som. Troszki to zetrwało, aż żech sie zećmioł. Jak żech już po leku kończoł, to wyjszła na dwor moja lepszo połowka i pado, co bych już prziszoł do dom, bo zrobioło sie zimno. Balnk niy wiym ło co ij szło, bo mie je fest gorko jeszcze do terozka.

Niy wiym, czy jutro rano niy byda umiyroł, ale żech poradzioł cołke te drewno w drewutnie pod daszkym se poskłodać.

Jak myślicie, zasłużoł żech na kufel biyru?

Łostońcie z Bogiym!