Dwa tydnie tymu jo mioł gyburstag, a dzisiej mo moja ślubno.
Dyć, jak co roku, bez poł miesionca mog żech sie nacieszyć modszom żonkom. No ja, sie skończyło i moja roztomiło zaś do mie doszlusowała.
Skuli tych naszych świont, wczoraj wyprawiali my fajer.
Na byzuch przyszli moi rodziciele (teściow to my łodwiedziyli dwa dni tymu nazod - na kerchowie), kuzynki i kuzyny z familyjami i moj bracik - kapelonek.
Dziecka poszli na piynterko i tam sie bawiyli, a my siedzieli przy srogim stole z fajnym biołym serwetym na kerym nakryli my nasze porcelanowe talyżyki i szolki. Po prowdzie to stoły w takich razach som dwa: nasz pokojowy na kerym zawsze jymy niydzielny łobiod i drugi kery my przyniyśli z dworu - taki łogrodkowy. Jak ludzi je kole dwudziestki, to przy jednym stole by my sie niy pomieściyli.
Ela rychtowała już dwa dni. Napiykła kołocza ze syrym, ciasto z kolorowom pianko-galaretkom i take trzecie ze szokoladom na wiyrchu, biszkoptym łod spodku, a pomiyndzy tym je bito śmietonka i take cosik co sie łonaczy z soczku z czornyj porzeczki z Lidla (ponoć ino tyn z Lidla sie nadowo). Jo zmloł i naparzoł kawy. Ale my sie pomaszkeciyli. Do tego boły tyż napoje rozweselajonce. Wedle uznania: abo ftoś woloł ryńske, połsłodke wino Spätlese, abo whisky.
Po swaczynie, kole łosmyj boła jeszcze wieczerzo. Tu zaś Ela narychtowała kitki z kurczaka, roztomajte szałoty: i z nudlami, inny z brokułami, pieczarkami i prażonym słoniolym, i jeszcze z fiszom, modrom cebulkom i majonezym. Do tego boł chlyb z roztomajtom bajlagom i tyj.
Piyknie my sie pojedli i popiyli tyż, choć jednak tak bez łostudy, że żodyn niy boł łożarty.
Ale musza Wom pedziedzieć, że to niy je nojważniejsze.
To co mie nojbardzij raduje to to, że mogymy sie wszyjscy naszom familijom spotkać, że mogymy sie połosprawiać. Czasym sie ftoś z kimś na kwila powadzi (nojgorzij jak keryś zacznie fandzolić ło polityce). Im som my starsi tym wincyj tyż chyba spominomy stare dzieje.
Myśla, że to je ważne, że tak trzymomy sie wszyjscy familijom do kupy.
Łostońcie z Bogiym!
Dyć, jak co roku, bez poł miesionca mog żech sie nacieszyć modszom żonkom. No ja, sie skończyło i moja roztomiło zaś do mie doszlusowała.
Skuli tych naszych świont, wczoraj wyprawiali my fajer.
Na byzuch przyszli moi rodziciele (teściow to my łodwiedziyli dwa dni tymu nazod - na kerchowie), kuzynki i kuzyny z familyjami i moj bracik - kapelonek.
Dziecka poszli na piynterko i tam sie bawiyli, a my siedzieli przy srogim stole z fajnym biołym serwetym na kerym nakryli my nasze porcelanowe talyżyki i szolki. Po prowdzie to stoły w takich razach som dwa: nasz pokojowy na kerym zawsze jymy niydzielny łobiod i drugi kery my przyniyśli z dworu - taki łogrodkowy. Jak ludzi je kole dwudziestki, to przy jednym stole by my sie niy pomieściyli.
Ela rychtowała już dwa dni. Napiykła kołocza ze syrym, ciasto z kolorowom pianko-galaretkom i take trzecie ze szokoladom na wiyrchu, biszkoptym łod spodku, a pomiyndzy tym je bito śmietonka i take cosik co sie łonaczy z soczku z czornyj porzeczki z Lidla (ponoć ino tyn z Lidla sie nadowo). Jo zmloł i naparzoł kawy. Ale my sie pomaszkeciyli. Do tego boły tyż napoje rozweselajonce. Wedle uznania: abo ftoś woloł ryńske, połsłodke wino Spätlese, abo whisky.
Po swaczynie, kole łosmyj boła jeszcze wieczerzo. Tu zaś Ela narychtowała kitki z kurczaka, roztomajte szałoty: i z nudlami, inny z brokułami, pieczarkami i prażonym słoniolym, i jeszcze z fiszom, modrom cebulkom i majonezym. Do tego boł chlyb z roztomajtom bajlagom i tyj.
Piyknie my sie pojedli i popiyli tyż, choć jednak tak bez łostudy, że żodyn niy boł łożarty.
Ale musza Wom pedziedzieć, że to niy je nojważniejsze.
To co mie nojbardzij raduje to to, że mogymy sie wszyjscy naszom familijom spotkać, że mogymy sie połosprawiać. Czasym sie ftoś z kimś na kwila powadzi (nojgorzij jak keryś zacznie fandzolić ło polityce). Im som my starsi tym wincyj tyż chyba spominomy stare dzieje.
Myśla, że to je ważne, że tak trzymomy sie wszyjscy familijom do kupy.
Łostońcie z Bogiym!
Brak komentarzy:
Prześlij komentarz